Հայկական կողմը որևէ հանդիպում չի չեղարկել. ԱԳՆ մամուլի քարտուղարը՝ Ալիևի՝ սահմանազատման հանձնաժողովի աշխատանքների մասին հայտարարությունների վերաբերյալ
ՀՀ ԱԳՆ մամուլի քարտուղար Վահան Հունանյանը մեկնաբանությամբ է հանդես եկել Ադրբեջանի նախագահի՝ սահմանազատման և սահմանային անվտանգության հանձնաժողովի աշխատանքների մասին հայտարարությունների վերաբերյալ:
«Հայկական կողմը շարունակում է հավատարիմ մնալ ձեռք բերված պայմանավորվածությունների կյանքի կոչմանը:
Ըստ այդմ՝ հայկական կողմը որևէ հանդիպում չի չեղարկել և չի մերժել:
Երկու երկրների ղեկավարների՝ Սոչիում և Բրյուսելում ձեռք բերված պայմանավորվածությունների շրջանակներում հայկական կողմը շարունակում է պատրաստակամ լինել հանձնաժողովների աշխատանքների մեկնարկը տալու համար»,- ասված է մեկնաբանության մեջ:
Հիշեցնենք՝ երեկ Ադրբեջանի նախագահը հայտարարել էր, թե Հայաստանը երկու անգամ չեղյալ է հայտարարել համաձայնեցված հանդիպումները:
