Մոսկվայում է Բելառուսի նախագահը

Իսրայելը չի քննարկում Գոլանի բարձունքների վերադարձը Սիրիային՝ հայտարարել է Իսրայելի արտաքին գործերի նախարար Յաիր Լապիդը՝ Ռուսաստանի ԱԳ նախարար Սերգեյ Լավրովի հետ բանակցություններից հետո կայացած մամուլի ասուլիսում: «Ներկայում Իսրայելի և Սիրիայի միջև բանակցություններ չեն ընթանում: Բանակցելու բան առանձնապես չկա»,- շեշտել է նա: Լավրովն ու Լապիդն անդրադարձել են Սիրիայում տիրող իրավիճակին, պաղեստինաիսրայելական հարաբերությունների կարգավորման և երկկողմ հարցերի այլ շրջանակի: Հանդիպման առանցքային թեմաներից է եղել նաև պատվաստումների վկայականների փոխադարձ ճանաչման հարցը. այդ քայլը թույլ կտա վերսկսել ճամփորդությունների հոսքը երկու երկրների միջև:

*****

Մոսկվայում է Բելառուսի նախագահը: Ալեքսանդր Լուկաշենկոն հանդիպել է Ռուսաստանի նախագահ Վլադիմիր Պուտինի հետ: Հանդիպման օրակարգում Միութենական պետության ներսում ինտեգրացիոն գործընթացների խթանմանն ուղղված աշխատանքների արդյունքներն են, ինչպես նաև ռուս-բելառուսական հարաբերությունների զարգացման այլ հարցեր: Բացի այդ, Դուշանբեում կայանալիք Հավաքական անվտանգության պայմանագրի կազմակերպության գագաթնաժողովի կապակցությամբ նախատեսվում է մտքերի փոխանակում տարածաշրջանային օրակարգի մի շարք արդիական հարցերի շուրջ, ներառյալ՝ Աֆղանստանում առկա իրավիճակը: Պուտին-Լուկաշենկո վերջին հանդիպումը տեղի էր ունեցել հուլիսի 13-ին:

*****

Իրանը կմիանա Շանհայի համագործակցության կազմակերպությանը: Կազմակերպությունում ընդգրկվելու ընթացակարգի մեկնարկի մասին նախատեսվում է հայտարարել Տաջիկստանում կայանալիք գագաթնաժողովում: Այդ մասին հայտնում է «Կոմերսանտը»՝ վկայակոչելով իր աղբյուրները: Կազմակերպության գագաթնաժողովը կկայանա Դուշանբերում՝ սեպտեմբերի 16-ին և 17-ին: Ներկայում կազմակերպության անդամներն են Ռուսաստանը, Հնդկաստանը, Ղազախստանը, Ղրղզստանը, Չինաստանը, Պակիստանը, Տաջիկստանը և Ուզբեկստանը: Իրանում Ռուսաստանի դեսպան Լևան Ճաղարյանն ավելի վաղ հայտարարել էր, որ Մոսկվան պաշտպանում է Շանհայի համագործակցության կազմակերպությանը լիիրավ անդամակցելու Թեհրանի հայտը, քանի որ Ռուսաստանը և Իրանը «մոտ են, իսկ մի շարք միջազգային ու տարածաշրջանային հարցերի շուրջ դիրքորոշումները համընկնում են»:

*****

ՀԱՊԿ-ում կարծում են, որ պետք է պատրաստ լինել Աֆղանստանում իրավիճակի ցանկացած զարգացման։ Այս մասին հայտարարել է ՀԱՊԿ Միացյալ շտաբի պետ, գեներալ-գնդապետ Անատոլի Սիդորովը: Նրա խոսքով՝ աֆղանստանյան զարգացումներով պայմանավորված՝ նախատեսվում են մի շարք զորավարժություններ:

*****

Եվրամիությունն Աֆղանստանում թալիբների ժամանակավոր կառավարությանը չի համարում ներառական և ներկայացուցչական ո՛չ էթնիկ, ո՛չ կրոնական տեսանկյունից: Այդ մասին հայտարարել է ԵՄ արտաքին քաղաքականության ծառայության խոսնակ Փիթեր Սթանոն։ Նրա խոսքով՝ ժամանակավոր կառավարության կազմը ներառում է միայն «Թալիբան» շարժման անդամներին, կին նախարարներ չկան: Դեռ սեպտեմբերի 2-3-ը Լյուբլյանայում կայացել է Եվրամիության արտագործնախարարների ոչ ֆորմալ հանդիպումը, որի շրջանակում քննարկվել է նաև Աֆղանստանի նոր իշխանության ճանաչման հնարավորությունը: Եվրոպացի գործիչները պայմանավորվել են, որ այդ հարցում առաջնորդվելու են մի շարք չափորոշիչներով, որոցից են կառավարության ներառականությունը, մարդու իրավունքների նկատմամբ հարգանքը և այլն:

*****

Աշխարհում 5.5 մլրդ դեղաչափ պատվաստանյութ է օգտագործվել։ Տեղեկությունը հայտնել է Առողջապահության համաշխարհային կազմակերպության գլխավոր տնօրենը: Թեդրոս Գեբրեյեսուսի խոսքով՝ պատվաստումների մեծ մասն արվել է բարձր եկամուտ ունեցող երկրներում, ինչը, ըստ նրա, վկայում է անհավասարության մասին։ Առողջապահության համաշխարհային կազմակերպության նպատակն է, որպեսզի մինչև սեպտեմբերի վերջ յուրաքանչյուր երկրում պատվաստվի բնակչության 10 տոկոսը, իսկ մինչև տարեվերջ՝ 40 տոկոսը։