Կարևոր է, որ մենք երեկ ունեցանք մեկ օրվա պատվաստման մեզ համար ռեկորդային ցուցանիշ․ Նիկոլ Փաշինյան

Մայրաքաղաքում երեկվանից գործարկված Պարեկային ծառայությունը լիովին նոր բնույթի ոստիկանություն է՝ գործադիրի նիստն այս իրադարձության քննարկմամբ սկսեց վարչապետի պաշտոնակատարը: Ճանապարհային ու պարեկապահակետային ոստիկանության հիմնական գործառույթները միավորած ստորաբաժանումը երթևեկության անվտանգության, հասարակական կանգուկանոնի պահպանումից բացի նաև հանցագործության կանխարգելման լիազորություն ունի: 698 պարեկի մեծ մասն էլ առաջին անգամ է համակարգում:

Ոստիկանության համակարգում այս բարեփոխումը սկսվել էր դեռ 2019-ից՝ հիշեցրեց Փաշինյանը: Ասաց՝ թերահավատներ կային, բայց կառավարությունը հետևողական եղավ, ծառայությունը ձևավորվեց: Ու թեև կորոնավիրուսի պատճառով մատակարարումների հարցում որոշ խնդիրներ են առաջացել, վարչապետի պաշտոնակատարը նկատեց՝ խանգարող հանգամանքները չեն ազդում, եթե կա քաղաքական կամք:

Ծառայության ներդրման գործընթացը շարունակվելու է, մարզերից առաջինը Շիրակում ու Լոռիում են շուտով սկսվելու անձնակազմի ընդունելության քննությունները:

Քննարկման հաջորդ թեման՝ կորոնավիրուսային իրավիճակն էր: Առողջապահության նախարարի պաշտոնակատարը վերջին տվյալները զեկուցեց՝ 5093 թեստից դրական է եղել 186-ը: Անահիտ Ավանեսյանի խոսքով՝ վարակման դեպքերը մի փոքր աճը նորից կարմիր լույս է վառում, հիշեցնում պատվաստման կարևորության մասին: Այստեղ էլ, ըստ ոլորտի ղեկավարի, աճի միտում կա:

Տեմպը պետք է պահպանվի ու մեկ օրվա կտրվածքով պատվաստման այդ ռեկորդային ցուցանիշը, որ երեկ գրանցվեց, պետք է չնվազի՝ հայտարարեց վարչապետի պաշտոնակատարը: Փաշինյանը մեջբերեց դռնփակ խորհրդակցությունների մեկի ժամանակ Տիգրան Ավինյանի արտահայտած միտքն ու փորձեց այդ օրինակով ցույց տալ, թե որքան կարևոր է պատվաստվելը:

Թագավարակի դեմ պատվաստանյութերից Հայաստանում հիմա կա երեքը՝ եվրոպական Աստրազենեկան, չինական կորոնավակն ու ռուսական Սպուտնիկ ՎԻ-ն: Դրանք բոլորն էլ հասանելի են, ընտրությունն ազատ է՝ սա էլ հիշեցրեց Անահիտ Ավանեսյանը, շեշտեց՝ աշխատում են այլ տեսակի պատվաստանյութեր ներկրելու ուղղությամբ: Վարչապետի պաշտոնակատարն էլ հանձնարարեց ուշադիր լինել՝ պոլիկլինականերում կազմակերպել սոցիալական հեռավորության պահպանումը, որ պատվաստման գնացած քաղաքացին հերթի մեջ քովիդով չվարակվի:

Անցնելով օրակարգին. գործադիրն այսօր բյուջեից վերաբաշխում արեց ու համաձայնություն տվեց դատական համակարգում նոր հաստիքներ ավելացնելուն: Խոսքը՝ մինչդատական քրեական վարույթին վերաբերող գործերը քննող առանձին դատավորներ ունենալու մասին է:

Նոր 20 դատավորները կանցնեն բարեվարքության ստուգում, գրավոր քննություն կտան ԲԴԽ-ում, ապա դասընթացներ՝ արդարադատության ակադեմիայում: Սա էլ դատական համակարգի բովանդակային բարեփոխումներից է՝ շեշտեց Փաշինյանը:

Մեկ այլ նախագծով էլ կառավարությունը բյուջեից 335 միլիոն դրամ հատկացրեց Կրթության նախարարությանը: Գումարը կուղղվի, որ պատերազնում զոհվածների, վիրավորվածների, նաև սոցիալապես անապահով ընտանիքների երեխաները 20 օր անցկացնեն մանկական ճամբարներում: Շահառուներն այս պահին 3200-ն են՝ 7-13 տարեկաններ: Զեկուցման ընթացքում Վահրամ Դումանյանը նաև տեղեկացրեց՝ ամառային օլիմպիադային պատրաստվող հայ ծանրորդների համար նախատեսված ծանրաձողներն արդեն ճանապարհին են, մինչև կիրակի կլինեն Հայաստանում: