Սահմանագծման և սահմանազատման գործընթացը հեշտ աշխատանք չէ: Այդ մասին Երևանի Շենգավիթ վարչական շրջանում ՔՊ կուսակցության համակիրների հետ հանդիպմանն ասաց վարչապետի պաշտոնակատար Նիկոլ Փաշինյանը:

Նա հիշեցրեց, որ հարևան Վրաստանի հետ սահմանազատման աշխատանքները շարունակվում են արդեն 30 տարի, և հաջողվել է համաձայնության գալ ընդամենը սահմանի 60 տոկոսի վերաբերյալ, իսկ 40 տոկոսի շուրջ աշխատանքները շարունակվում են: Հատկապես Ադրբեջանի պարագայում, ըստ նրա, խնդիրներ իհարկե ծագելու են:

«Մենք Ադրբեջանի հետ քննարկում ենք այդ հարցը, քանի որ այդ պարիսպը ինչպես մեզ է պետք, այնպես էլ իրենց: Այդ պարիսպը նշանակում է, որ ամեն սարի գլխին զինվոր ունենալու անհրաժեշտությունը վերանում է: Բայց դա չի նշանակում, որ սարը մեզ պետք չի, կամ սարից մենք հրաժարվում ենք, դա նշանակում է, որ սարը պաշտպանված է պարսպով: Եվ սա է մեր մոտեցումն ու դիրքորոշումը: Իրավիճակը, իհարկե, լարված է, ոչ ոք չի ասում, որ ՀՀ քաղաքացին չպետք է մտահոգվի, բայց այդ մտահգությունները եղել են և՛ 10 տարի առաջ, և՛ 15 տարի առաջ: Հակամարտության սկզբից ի վեր մեր երկրում խաղաղություն չի եղել, մենք 30 տարում միշտ զոհեր ենք ունեցել»,- ասաց Փաշինյանը:

Սահմանագծումն ու սահմանազատումը հեշտ գործընթաց չեն, Վրաստանի հետ այդ հարցով արդեն 30 տարի աշխատում ենք. Փաշինյան