Չէի ցանկանա ՀԱՊԿ-ում խորհրդակցությունների ընթացքը կանխորոշել. ԱԳ փոխնախարար Արտակ Ապիտոնյան
ՀԱՊԿ-ը արձագանքելու երեք օրվա ժամկետ ունի։ Այս մասին այսօր՝ մայիսի 14-ին, Ազգային ժողովում՝ լրագրողների հետ զրույցում ասաց ԱԳ փոխնախարար Արտակ Ապիտոնյանը։
«Երեք օրվա ընթացքում մեխանիզմն սկսում է աշխատել։ Մեխանիզմը ենթադրում է արտահերթ խորհրդակցություններ ՀԱՊԿ-ի անդամ-երկրների մեջ, որի ընթացքում էլ ձևավորվում է համապատասխան միջոցառումների առաջարկներ։ Միջոցառումների առաջարկներն էլ կախված են իրադարձությունների զարգացումից:
Չորրորդ հոդվածի գործարկման համար անհրաժեշտ է հստակ սահմանել իրավիճակը: Անհրաժեշտություն կար նախ սկսելու քննարկումները ՀԱՊԿ-ի գործընկերների հետ՝ հասկանալու պրոցեդուրաները։ Պետք է նկատի ունենալ, որ ՀԱՊԿ-ի այս գործընթացը երբեք չի գործարկվել, սա առաջին դեպքն է։ Չէի ցանկանա ՀԱՊԿ-ում խորհրդակցությունների ընթացքը կանխորոշել»,- նշեց ԱԳ փոխնախարարը:
Անդրադառնալով ՄԱԿ-ի անվտանգության խորհուրդ դիմելուն՝ Ապիտոնյանն ասաց. «Մենք իրավիճակի մասին տեղեկացրել ենք թե՛ ՀԱՊԿ-ի մեր գործընկերներին, թե՛ ԵԱՀԿ-ի գործող նախագահողին և տեղեկացրել ենք ՄԱԿ-ի անվտանգության խորհրդի անդամներին»։
ԱԳ փոխնախարարը նշեց, որ ՀՀ վարչապետի ժամանակավոր պաշտոնակատար Նիկոլ Փաշինյանը նամակ է գրել ՌԴ նախագահ Վլադիմիր Պուտինին։ Նա նշեց, որ այն ընթացքի մեջ է:
