ԱԺ «Լուսավոր Հայաստան» խմբակցության ղեկավար Էդմոն Մարուքյանն այսօր լրագրողների հետ զրույցում անդրադարձել է ՍԴ-ում պատգամավորների 1/5-ի դիմումի քննությանը, որով վիճարկում էին 2020 թ. հունիսի 22-ին խորհրդարանի ընդունած սահմանադրական փոփոխությունների ընթացակարգը:
Մարուքյանը հիշեցրեց՝ խորհրդարանը 2020 թ. հունիսին առաջին ընթերցմամբ ընդունեց սահմանադրական փոփոխությունների նախագիծը, որը չէին ուղարկել ՍԴ՝ եզրակացություն ստանալու համար: Բացի դրանից՝ պատգամավորները վիճարկում էին այն հանգամանքը, որ սահմանադրական փոփոխությունների նախագիծը ստորագրեց ոչ թե նախագահը, այլ սահմանված ժամկետից հետո՝ ԱԺ նախագահը:
«ՍԴ-ում գործի քննությունը հետաձգվել է ապրիլի 20-ը: Գործի այն մասերով, որը վերաբերում է լիազորությունների վեճին, կարճվել է, և մնացել են միայն Ազգային ժողովի կանոնակարգ սահմանադրական օրենքի մասով վիճարկման հարցերը, որն, ըստ էության, այդ մասով եթե բավարարվի, կարծում եմ, էլի հնարավրություն կլինի սահմնանադրական փոփոխություններին անդրադառնալ: Մի շարք վիճահարույց հարցեր կան: Սահմանադրությունն այնպես է գրված, որ տարբեր ձևերով սողանքներ են թողնված»,- ասաց Մարուքյանը:
