Նոյեմբերի 12-ին Դուբլինում Ֆրանսիայի նախաձեռնությամբ ընդունվել է «Եվրոպայի անվտանգության հիմնական սկզբունքների մասին» հռչակագիրը։ Այն ռազմական դաշինք չի ստեղծում, այլ քաղաքական հայտարարություն է՝ ուղղված միջազգային իրավունքի և եվրոպական անվտանգության գործող մեխանիզմների ամրապնդմանը։
Այս փաստաթուղթն ընդունվել է մի փուլում, երբ ԱՄՆ-ի նախաձեռնությամբ փորձ է արվում վերականգնել ուկրաինական կարգավորման բանակցային գործընթացը, իսկ ամերիկյան մամուլը տեղեկացնում է Ռուսաստանի նոր պահանջների մասին։ Աբու Դաբիում ԱՄՆ-Ռուսաստան-Ուկրաինա ձևաչափով երկօրյա բանակցություններից հետո Կրեմլը հայտարարել է «անբաժանելի անվտանգության և խաղաղության նոր, երկարաժամկետ ճարտարապետության» մասին։
Արևմտյան մամուլին հայտնի է դարձել, որ Ռուսաստանը ԱՄՆ նախագահի հատուկ բանագնաց Ուիթքոֆին ներկայացրել է ՆԱՏՕ-ն 1997 թ. սահմաններին վերադարձնելու պահանջ՝ բացառելով հետխորհրդային որևէ երկրի անդամակցությունը կամ նրանց տարածքում սպառազինությունների տեղաբաշխումը։
Ռուսաստանի նախագահի օգնական Մեդինսկին, որն Ուկրաինայի հետ բանակցություններում ռուսաստանյան պատվիրակության ղեկավարն է, այդ պահանջները հիմնավորել է «Յալթա-2» կազմակերպելու անհրաժեշտությամբ։ Խոսքը Երկրորդ համաշխարհային պատերազմից հետո ԱՄՆ-ի, ԽՍՀՄ-ի և Մեծ Բրիտանիայի միջև «աշխարհի բաժանման» նախադեպը կրկնելու մասին է։
Սպիտակ տունն անոնսավորել է, որ նոյեմբերի 19-ին Չինաստանի Շենչժեն քաղաքում տեղի կունենա Թրամփ-Պուտին-Սի Ծինփին հանդիպումը։ «Եվրոպական անվտանգության հիմնական սկզբունքների» մասին հռչակագիրը, կարծես, ազդակ է, որ առանց Եվրոպայի հնարավոր չէ «աշխարհի նոր բաժանում» կատարել։ Ուշագրավ է, որ թեև Դուբլինում կայացել է Զելենսկի-Ալիև հանդիպումը, պաշտոնական Բաքուն չի միացել «Եվրոպայի անվտանգության հիմնական սկզբունքների մասին» հռչակագրին, որով մասնակիցները լիակատար աջակցություն են հայտնում 1991 թ. սահմաններով Ուկրաինայի տարածքային ամբողջականության վերականգնմանը։
Վահրամ Աթանեսյան
