Ուկրաինայի նախագահ Վոլոդիմիր Զելենսկին հեռախոսազրույց է ունեցել ԱՄՆ նախագահի բանագնացներ Սթիվ Ուիթքոֆի և Ջարեդ Քուշների հետ՝ Աբու Դաբիում հաջորդ շաբաթ կայանալիք եռակողմ բանակցություններին ընդառաջ:
Ի թիվս այլ հարցերի, քննարկվել են նաև հակաօդային պաշտպանությունը, Patriot համակարգերի հրթիռների անհրաժեշտությունը: Զելենսկին շնորհակալություն է հայտնել ամերիկյան կողմին Ուկրաինայի անկախությանն աջակցելու և դիվանագիտական ջանքերի համար, շեշտել հետպատերազմյան ամուր անվտանգության երաշխիքների կարևորությունը:
Քուշներն իր հերթին նշել է, որ նախագահի հրահանգով ամերիկյան կողմն աշխատում է կողմերի հետ՝ կայուն խաղաղության հասնելու համար: Նրա խոսքով՝ նպատակն է ոչ միայն պատերազմի ավարտը, այլև ավելի լայն անվտանգության ճարտարապետության ստեղծումը, որը կերաշխավորի, որ հակամարտությունն այլևս չի կրկնվի:
