Նոյեմբերի 1-ին պաշտոնապես ուժի մեջ է մտել Ռուսաստանի դուրս գալը Խոշտանգումների և անմարդկային կամ արժանապատվությունը նվաստացնող վերաբերմունքի և պատժի կանխարգելման եվրոպական կոնվենցիայից: Այս մասին հայտնում է Եվրոպայի խորհրդի մամուլի ծառայությունը։
Դա նշանակում է, որ Խոշտանգումների կանխարգելման կոմիտեն (ԽԿԿ) այլևս չի կարող այցելել Ռուսաստանի կալանավայրեր և/կամ ստուգումներ անցկացնել նման հաստատություններում։
Ինչպես նշել է Եվրոպայի խորհուրդը, Ռուսաստանի իշխանությունները դադարեցրել են համագործակցել ԽԿԿ-ի հետ 2022 թվականի փետրվարին։ Իսկ 2025 թվականի սեպտեմբերին Վլադիմիր Պուտինը հրամանագիր է ստորագրել Խոշտանգումների կանխարգելման եվրոպական կոնվենցիայից Ռուսաստանի դուրս գալու մասին։
Միևնույն ժամանակ, Ուկրաինայի իշխանությունները շարունակում են թույլատրել կոմիտեի աշխատակիցներին այցելել երկրի ցանկացած կալանավայր՝ իրենց ընտրությամբ։ Ավելին՝ Կիևը պարբերաբար հրապարակում է ԽԿԿ-ի զեկույցները ավտոմատ ռեժիմով։
