Խորհրդարանը քննարկում է Մրցակցության և սպառողների շահերի պաշտպանության հանձնաժողովի անդամի ընտրության հարցը։
ԱԺ նախագահի տեղակալ Հայկ Կոնջորյանը հայտնեց՝ «Հայաստան» և «Ուժեղ Հայաստան» խմբակցությունները Մրցակցության և սպառողների շահերի պաշտպանության հանձնաժողովի անդամի պաշտոնի համար որպես համաձայնեցված միասնական թեկնածու առաջադրել են Արծվիկ Մինասյանին։
Թեկնածուին ներկայացրեց «Հայաստան» խմբակցության քարտուղար Արթուր Խաչատրյանը։
Խաչատրյանի խոսքով՝ Մինասյանն իր աշխատանքային կենսագրությունում համադրել է գործադիր և օրենսդիր մարմիններում աշխատանքը, ինչպես նաև մանկավարժական աշխատանքը։
Արծվիկ Մինասյանը ծնվել է 1972 թվականի հունվարի 1-ին Թալինի շրջանի Ոսկեթաս գյուղում, 1995 թվականին ավարտել է Երևանի պետական համալսարանի տնտեսագիտության ֆակուլտետը՝ ստանալով տնտեսագետ-մաթեմատիկոսի որակավորում «տնտեսագիտական կիբեռնետիկա» մասնագիտությամբ։
1995-1998 թվականներին սովորել է Երևանի պետական համալսարանի ասպիրանտուրայում, 2000-ին պաշտպանել է թեկնածուական ատենախոսություն։
Տնտեսագիտության թեկնածու է, մեկ տասնյակից ավելի գիտական հրապարակումների հեղինակ։
1997-1998 թվականներին կարճաժամկետ ծրագրերով ուսումը շարունակել է Ռուսաստանի Դաշնության մայրաքաղաք Մոսկվայում, ԱՄՆ-ի Վաշինգտոն և Նյու Յորք քաղաքներում՝ մասնակցելով անցումային շրջանի տնտեսական վերափոխումների հիմնախնդիրներին նվիրված դասընթացներին։
2000-ին ավարտել է Երևանի պետական համալսարանի իրավաբանական ֆակուլտետը՝ ստանալով իրավաբանի որակավորում «իրավագիտություն» մասնագիտությամբ։
Աշխատանքային գործունեությունը, ըստ Խաչատրյանի, սկսել է ուղիղ 30 տարի առաջ՝ 1996 թվականին, հանրային ծառայությունում աշխատանքն սկսելով սկզբնակետից։
2005-2007 թվականներին աշխատել է ՀՀ աշխատանքի և սոցիալական հարցերի նախարարի տեղակալի պաշտոնում, պաշտոնավարումը դադարեցրել է, քանի որ ընտրվել է ԱԺ պատգամավոր։
Եղել է չորրորդ, հինգերորդ և ութերորդ գումարումների ԱԺ պատգամավոր։
2012 թ. հունիսի 20-ին վերընտրվել է Ազգային ժողովի ֆինանսավարկային և բյուջետային հարցերի մշտական հանձնաժողովի նախագահի տեղակալ։
2021-2026 թվականներին նախորդ գումարման ԱԺ-ում եղել է «Հայաստան» խմբակցության քարտուղար։
2016-ի փետրվար-հոկտեմբերին աշխատել է ՀՀ էկոնոմիկայի նախարարի պաշտոնում, ապա 2016 թվականից մինչև 2018 թվականի մայիսը եղել է ՀՀ բնապահպանության նախարար։
Պահեստազորի սպա է, ՀՅԴ անդամ։
Իր խոսքում Արծվիկ Մինասյանն ասաց՝ իր համար մեծ պատիվ է ընդդիմադիր երկու խմբակցությունների կողմից այդ պատասխանատու պաշտոնում առաջադրվելը։
«Լիարժեքորեն պատրաստ եմ իմ համեստ մասնակցությունն ունենալ սահմանադրական երկու կարևորագույն լիազորություններով օժտված մարմնի՝ Մրցակցության և սպառողների շահերի պաշտպանության հանձնաժողովի գործառույթներն արդյունավետորեն իրականացնելու գործում՝ ոչ միայն Սահմանադրությամբ նախանշված նպատակներին հասնելու, այլև երկու առանցքային ու սկզբունքային ոլորտներում հիմնարար փոփոխություններ բերելու համար», - ասաց թեկնածուն։
