Բոլոր նրանց, ովքեր երաշխավորներ են փնտրում, ես խորհուրդ կտամ ծանոթանալ Հայաստանի վերջին տասնամյակների և հայ ժողովրդի վերջին համարյա 150 տարվա պատմությանը։ Բոլոր այն դեպքերում, երբ եղել են երաշխավորներ, դա Հայաստանի և հայ ժողովրդի համար ավարտվել է աղետով։ Ճշգրիտ՝ այնտեղ, որտեղ եղել է երաշխավոր, վերջը եղել է աղետ։ Այդ մասին ԱԺ-Կառավարություն հարցուպատասխանի ժամանակ ասաց վարչապետ Նիկոլ Փաշինյանը՝ պատասխանելով ՔՊ խմբակցության պատգամավոր Քնարիկ Հարությունյանի՝ ԹՐԻՓՓ նախագծում երաշխավորի ինստիտուտի բացակայության հետ կապված ընդդիմության դժգոհությունների վերաբերյալ հարցին:
«Այդ երաշխավորի խոսույթը տանելը չիմացության հետևանք է. պատմության չիմացության հետևանք է, ընթացիկ իրողությունների չիմացության հետևանք է։ Եվ ես այդ օրինակն էլի եմ բերել՝ Ուկրաինայի անվտանգության երաշխավորը գիտե՞ք՝ ով է»,- նշեց վարչապետը։
