«TRIPP զարգացման ընկերությունը» կհիմնադրվի Հայաստանում՝ որպես բաժնետիրական ընկերություն ՀՀ-ի և ԱՄՆ-ում ստեղծվելիք «TRIPP զարգացման ընկերություն (ԱՄՆ)» ընկերության կողմից:
Այդ մասին ՀՀ ԱԺ արտաքին հարաբերությունների մշտական հանձնաժողովի նիստում ասաց ԱԳՄԱ նախարար Արարատ Միրզոյանը՝ ներկայացնելով «ՀՀ-ի և ԱՄՆ-ի միջև «Թրամփի ուղի՝ հանուն միջազգային խաղաղության և բարգավաճման» նախագծի վերաբերյալ ռազմավարական համագործակցության մասին շրջանակային համաձայնագիրը» վավերացնելու մասին» նախագիծը:
««TRIPP զարգացման ընկերություն (ԱՄՆ)»-ն մշտապես պետք է պատկանի Միացյալ Նահանգների կառավարությանը, և չի կարող օտարվել կամ ներգրավել որևէ երրորդ կողմի»,- պարզաբանեց նախարարը՝ նշելով, որ այդ մասով կան ԱՄՆ Կառավարության ստորագրությունն ու պարտավորությունը:
Բաժնեմասերի բաշխման համաձայն՝ ԱՄՆ-ն կվերահսկի հայաստանյան ընկերության բաժնեմասերի 74 տոկոսը, իսկ ՀՀ-ն կունենա բաժնեմասերի 26 տոկոսը: Այս կարգավորումը կգործի 49 տարի:
Ժամկետը լրանալուց հետո ՀՀ-ի բաժնեմասերը կդառնան 49 տոկոս՝ առանց ՀՀ-ի կողմից հավելյալ միջոցների ներդրման՝ ֆինանսական կամ այլ, իսկ «TRIPP զարգացման ընկերություն (ԱՄՆ)» ընկերության բաժնեմասերը կդառնան 51 տոկոս:
