Նիցցայի բժշկական կենտրոններում մասնագիտական վերապատրաստում անցած 12 բժիշկներ վերադարձել են Հայաստան: Այս մասին տեղեկացնում են ՀՀ առողջապահության նախարարությունից:
Նախարար Անահիտ Ավանեսյանը, կարևորելով միջազգային փորձի փոխանակման կարևորոթյունը, մեր բուժանձնակազմի մասնագիտական կարողությունների անընդմեջ բարելավման անհրաժեշտությունը, ընդունել է Ֆրանսիայից վերադարձած բժիշկներին՝ նրանցից լսելու համագործակցության արդյունավետության վերաբերյալ կարծիքներ:
Հանդիպմանը ներկա են եղել նաև Լազուրե Ափի Հայկական ասոցիացիաների համակարգող խորհրդի և «SOS-Armenie Cote d'Azur» ասոցիացիայի ներկայացուցիչները. ասոցիացիայի և առողջապահության նախարարության համագործակցությամբ է իրականացվում այս ծրագիրը:
Հանդիպմանը քննարկվել է նաև համագործակցության և, մասնավորապես, այս ծրագրի ընդլայնման հնարավորությունը, ըստ որի՝ բացի բժիշկներից, ծրագրի շրջանակում, Ֆրանսիայում մասնագիտական վերապատրաստման հնարավորություն կունենան առողջապահության քաղաքականություն մշակողները, առողջապահական համակարգի ղեկավարները և մենեջերները:
