Պետեր Մադյարը հեռացող արտգործնախարարին մեղադրել է գաղտնի փաստաթղթեր ոչնչացնելու համար
Հունգարիայի խորհրդարանի ընտրությունում հաղթած ընդդիմադիր «Տիսա» կուսակցության առաջնորդը հեռացող արտգործնախարար Պետեր Սիյարտոյին մեղադրել է գաղտնի փաստաթղթեր ոչնչացնելու համար։ Պետեր Մադյարն այդ հայտարարությունն արել է Բուդապեշտում կայացած միջազգային մամուլի ասուլիսում։
Նախընտրական քարոզարշավի ընթացքում Սիյարտոն մեղադրվել է իր ռուսաստանցի գործընկեր Սերգեյ Լավրովի հետ սերտ կապեր պահպանելու և նրան Հունգարիայի օգնություն առաջարկելու համար՝ ռուսաստանցիներին ԵՄ պատժամիջոցների ցուցակից հանելու հարցում։
«Այսօր՝ առավոտյան ժամը 10-ին, նա ներկայացավ արտաքին գործերի նախարարություն, և իր ամենամտերիմ գործընկերների հետ ոչնչացնում է պատժամիջոցների հետ կապված փաստաթղթերը»,- հայտարարել է Մադյարն ու հավելել՝ տեղեկատվությունը ստացել է նախարարության ներքին աղբյուրներից, որտեղ շատ պաշտոնյաներ ակտիվորեն օգնում են իր «Տիսա» կուսակցությանը։
«Սա է այն, ինչ հիմա տեղի է ունենում Հունգարիայում։ Մենք մի քանի օր է, ինչ գիտենք, որ փաստաթղթերի ոչնչացումը սկսվել է ոչ միայն նախարարություններում, այլև Օրբանի վերնախավի հետ կապված մյուս հաստատություններում»,- ասել է Մադյարը։
