Շնորհավորում եմ Ձեզ գերագույն առաջնորդի պաշտոնում նշանակվելու կապակցությամբ. Իլհամ Ալիևը՝ Մոջթաբա Խամենեիին

Ադրբեջանի նախագահ Իլհամ Ալիևը շնորհավորական նամակ է հղել Իրանի գերագույն առաջնորդ այաթոլլահ Մոջթաբա Խամենեիին՝ այդ բարձր պաշտոնում նշանակվելու կապակցությամբ։

Նամակում պետության ղեկավարը կրկին ցավակցություն է հայտնել Մոջթաբա Հուսեյն Խամենեիի հոր՝ Սեյեդ Ալի Խամենեիի մահվան կապակցությամբ։

«Ադրբեջանի Հանրապետության և Իրանի Իսլամական Հանրապետության միջև հարաբերությունները պատմականորեն հիմնված են մեր ժողովուրդների կամքի վրա, որոնք ապրել են բարիդրացիական և բարեկամական պայմաններում։ Հուսով եմ, որ համատեղ ջանքեր կգործադրենք միջպետական կապերը զարգացնելու համար՝ հիմնված փոխադարձ հարգանքի և վստահության վրա, մեր ժողովուրդների շահերին համապատասխան:

Մեկ անգամ ևս շնորհավորում եմ Ձեզ այս նշանակման կապակցությամբ և Իրանի բարեկամ ու եղբայրական ժողովրդին մաղթում եմ խաղաղություն և բարգավաճում»,- ասվում է Ադրբեջանի նախագահի ուղերձում։