Հայաստան–ԱՄՆ երկկողմ հարաբերությունների շարունակական զարգացումն ու ամրապնդումը ռազմավարական առաջնահերթություն են. ԲՏԱ նախարար
Սեպտեմբերի 12-ին ՀՀ բարձր տեխնոլոգիական արդյունաբերության նախարար Մխիթար Հայրապետյանն ընդունել է ԱՄՆ պետքարտուղարության Եվրոպայի և Եվրասիայի հարցերով բյուրոյի ավագ պաշտոնյա Բրենդան Հենրեհենի գլխավորած պատվիրակությանը։
Նախարար Հայրապետյանը, ողջունելով պատվիրակության անդամներին, բարձր է գնահատել այցի կարևորությունը՝ ընդգծելով, որ ՀՀ կառավարության համար Հայաստան–ԱՄՆ երկկողմ հարաբերությունների շարունակական զարգացումն ու ամրապնդումը ռազմավարական առաջնահերթություն են։ Նախարարը նշել է, որ այցը դիտարկվում է որպես հարաբերությունների նոր որակի հաստատման կարևոր քայլ։
Հանդիպման ընթացքում Մխիթար Հայրապետյանը վստահություն է հայտնել, որ պատվիրակության այցը մեծապես կնպաստի օգոստոսի 8-ի՝ ՀՀ և ԱՄՆ կառավարությունների միջև արհեստական բանականության և կիսահաղորդիչների ոլորտում նորարարական գործընկերության մասին փոխըմբռնման հուշագրով նախատեսված միջոցառումների արդյունավետ իրականացմանը։ Նախարարի խոսքով՝ այս համագործակցությունը լայն հնարավորություններ է ստեղծում Հայաստանի տնտեսության զարգացման տեսանկյունից։
Իր խոսքում Բրենդան Հենրեհենը նշել է, որ ՀՀ-ԱՄՆ փոխըմբռնման հուշագրի բովանդակությունը վկայում է այն մասին, որ տեխնոլոգիական ոլորտում առկա է երկկողմ համագործակցության մեծ ներուժ։
Հանդիպման ընթացքում քննարկվել է հարցերի լայն շրջանակ, մասնավորապես, արհեստական բանականության ուղղությամբ ներդաշնակ քաղաքականությունների մշակման հնարավորությունները, Հայաստանի կիսահաղորդիչների էկոհամակարգում ներդրումների իրականացումը և չիպերի նախագծման, նույնականացման և թեստավորման կարողությունների զարգացումը։ Անդրադարձ է կատարվել նաև Հայաստանում ամերիկյան վերազգային ընկերությունների ներգրավվածության ընդլայնման, ներդրումների խթանման, արտահանման ընթացակարգերի պարզեցման, գիտահետազոտական (R&D) նախագծերի իրականացման, Firebird ընկերության՝ ԱԲ տվյալային կենտրոնի համար նախատեսված ենթակառուցվածքի համար արտահանման թույլտվության տրամադրման վերաբերյալ հարցերի և գործող լուծումների բարելավման շրջանակ:
Հատուկ ուշադրություն է դարձվել կիբեռանվտանգության և տիեզերական ոլորտներում համագործակցության ընդլայնմանը, ինչպես նաև տեխնոլոգիական ոլորտում Հայաստան–ԱՄՆ հարաբերությունների հետագա զարգացման հնարավոր այլ ուղղություններին։
