Մեր պատմության մեջ առաջին անգամ է, որ ժողովուրդը, որպես սուբյեկտ, կարող է ազդեցություն ունենալ սեփական ապագայի ձևավորման հարցում․ Հայկ Կոնջորյան
Մեր պատմության մեջ առաջին անգամ է, որ իր համար բախտորոշ հարցերում ժողովուրդը, որպես սուբյեկտ, կարող է որոշում կայացնել և ազդեցություն ունենալ սեփական ապագայի ձևավորման հարցում: Ֆեյսբուքյան էջում նման գրառում է արել «Քաղաքացիական պայմանագիր» խմբակցության ղեկավար Հայկ Կոնջորյանը։
«Մինչ այս, բոլոր նման իրավիճակներում, ժողովուրդը խաղից դուրս է եղել, բայց վերջնարդյունքում ինքն է փակել հաշիվը: Կլինի դա պետականության կորուստ թե պետության համար մեկ այլ վճռական որոշում՝ նախկին կառավարիչները, երբեմն բարձրաստիճան հոգևորականների հետ միասին, որոշել են ժողովրդի փոխարեն` նրա թիկունքի հետևում: Այսօր էլ, ահաբեկչության միջոցով իշխանություն զավթելու ձգտումները կրկին ժողովրդի թիկունքում ժողովրդի հարցը լուծելու փորձ է:
Ի դեպ, սա ձեռք է տալիս կայսրություններին, որովհետև ամբողջ ժողովրդի հետ պայմանավորվել դժվար է, իսկ մի քանի հոգու հետ, որոնք չունեն ժողովրդի մանդատը` հեշտ: Ահա թե ինչու, ժողովրդի մասնակցությունն այս օրերի խոսակցությանը, նույնիսկ չափից ավելի թեժ բանավեճերի տեսքով, ժողովրդի իշխանության դրսևորման ձև է:
Շատերը բողոքում են, որ այս քաղաքական թոհուբոհի մեջ մարդկանց նյարդերը տեղի են տալիս: Այո, դա բոլոր ժողովրդավարությունների անհրաժեշտ պայմանն է: Ավելի լավ է ունենալ անհանգիստ նյարդեր, քան հանգիստ բռնապետություն»,- գրել է նա:
