ԱՄՆ նախագահ Դոնալդ Թրամփը հայտարարել է, որ ԱՄՆ-ն և Չինաստանը առևտրային համաձայնագիր են կնքել։ Այլ մանրամասներ Սպիտակ տան ղեկավարը չի հայտնել:
ԱՄՆ առևտրի նախարարն էլ նշել է, որ Վաշինգտոնը և Պեկինը վերջնականացրել են մայիսին Ժնևում ձեռք բերված առևտրային համաձայնագիրը։ Հովարդ Լութնիկը հավելել է, որ փաստաթուղթը ստորագրվել է երկու օր առաջ: Դրա համաձայն՝ Չինաստանը, ի թիվս այլնի, պարտավորվում է Միացյալ Նահանգներին հազվագյուտ մետաղներ մատակարարել։
«Երբ դա տեղի ունենա, կվերացնենք ամերիկյան սահմանափակումները»,- նշել է պաշտոնյան։ Լութնիկը տեղեկացրել է, որ առաջիկայում Սպիտակ տունը նախատեսում է առևտրային համաձայնագրեր կնքել առևտրային խոշոր տասը գործընկերների հետ։
Ավելի վաղ հայտարարված մաքսատուրքերի բարձրացման ֆոնին Վաշինգտոնը առևտրային համաձայնագրի նոր առաջարկ է ներկայացրել նաև Եվրամիությանը: Եվրահանձնաժողովի նախագահը հայտնել է, որ Բրյուսելն այժմ գնահատում է փաստաթուղթը՝ հետագա բանակցությունների համար:
«Պատրաստ ենք գործարքի։ Սակայն անհրաժեշտության դեպքում կպաշտպանենք եվրոպական շահերը»,- հավելել է Ուրսուլա ֆոն դեր Լայենը:
