Մեր հանձնառությունն է հնարավորինս հեշտացնել ձեր բուժօգնություն ստանալու գործընթացը. Ավանեսյանը՝ ԼՂ-ից տեղահանված կանանց
Առողջապահության նախարարությունից հայտնում են, որ նախարար Անահիտ Ավանեսյանը հերթական հանդիպումն է ունեցել ԼՂ-ից բռնի տեղահանված մի խումբ կանանց հետ:
«Մեր հանձնառությունն է հնարավորինս հեշտացնել ձեր բուժօգնություն ստանալու գործընթացը, հարթել արհեստական դժվարություններ առաջացնող խնդիրները, իրազեկել առողջապահական ծրագրերի մասին»,- նշել է նախարարը` հավելելով, որ շարունակական այս հանդիպումների նպատակը տեղահանված մեր հայրենակիցների առողջապահական խնդիրների մասին հենց առաջին ձեռքից իմանալն է:
Պետական պատվերից օգտվելու, սքրինինգային ծրագրերի շահառու դառնալու, ինչպես նաև` քրոնիկական հիվանդություններ ունեցողների բուժօգնության կազմակերպման և դեղապահովման կարգի մասին մանրամասն պարզաբանումներ է տվել Անահիտ Ավանեսյանը:
Նախարարը նորից հիշեցրել է` Հայաստանի Հանրապետության քաղաքացի դառնալը չի զրկում պետական պատվերով տրամադրվող բուժսպասարկման հնարավորությունից:
«Քաղաքացիական ՀԱԲ» ՀԿ-ի նախաձեռնությամբ կայացած հանդիպմանը կանայք բարձրացրել են հարցեր, որոնց մի մասին նախարարը տեղում տվել է լուծումներ, համապատասխան ստորաբաժանումներին` հանձնարարականներ:
Ամփոփիչ խոսքում նախարարը նշել է, որ այս պահին ֆինանսական խնդիրներ առաջացնող որոշ հարցեր լուծվելու են առողջության համապարփակ ապահովագրության ներդրմամբ:
