Անօդաչու թռչող սարքը հարձակում է իրականացրել Գրոզնիում: Թիրախը եղել է Ահմադ Կադիրովի անվան ոստիկանության հատուկ գնդի զորանոցը՝ Ռուսաստանի ՆԳՆ գունդը Չեչնիայում: Հինգշաբթի՝ դեկտեմբերի 12-ի առավոտյան, Չեչնիայի ղեկավար Ռամզան Կադիրովը Telegram-ում հայտնել է, որ անօդաչու թռչող սարքը խոցվել է, բեկորներից վնասվել է շենքի տանիքը, կոտրվել են ապակիները, փոքր հրդեհ է բռնկվել: Սա երկրորդ անօդաչու սարքի հարձակումն է ոստիկանության հատուկ գնդի վրա։
Առաջին անգամ անօդաչու սարքերը Չեչնիայի վրա հարձակվել են հոկտեմբերի վերջին։ Հարվածի թիրախը եղել է Գուդերմեսի ռուսական հատուկ նշանակության ուժերի համալսարանը: Արդյունքում հրդեհվել է շենքի տանիքը։ Ուսումնական հաստատությունը հիմնադրվել է 2013 թվականին Կադիրովի նախաձեռնությամբ և կրում է ՌԴ նախագահ Վլադիմիր Պուտինի անունը: Այն զինվորներ է պատրաստում Ուկրաինայի դեմ պատերազմի համար։ Ավելի ուշ Կադիրովը հայտարարել էր, որ անօդաչու թռչող սարքի հարձակման հետևանքով ուկրաինացի զինվորներ են զոհվել։
Իր հերթին, ՌԴ ՊՆ-ն հայտարարել է, որ անցած գիշեր ռուսական հակաօդային պաշտպանության համակարգերը ոչնչացրել են 16 ուկրաինական դրոն, այդ թվում՝ մեկը Չեչնիայում և երեքը՝ հարևան Հյուսիսային Օսիայում։ Եվս չորս հարձակողական անօդաչու թռչող սարք են խոցել Կուրսկի շրջանում, ութը՝ Ղրիմում։
