77-ամյա բրիտանացի հանրահայտ երգիչ, երգահան Սըր Էլթոն Ջոնը կիրակի այցելել էր Լոնդոնի Ուեսթ Էնդում շոուի բացմանը մասնակցելու, որտեղ էլ հանդիսատեսին հայտնել էր, որ կորցրել է տեսողությունը գրում է Daily Mail-ը:
«Ձեզանից ոմանք երևի գիտեն, որ ես խնդիրներ ունեի, և հիմա կորցրել եմ տեսողությունս: Չկարողացա տեսնել ներկայացումը, բայց այն ինձ դուր եկավ»,- ասել է երաժիշտը:
Վերջին ամիսներին Էլթոն Ջոնն ասում էր, որ աչքի վարակի պատճառով չի կարողանում տեսնել աջ աչքով, բայց ձախն էլ լավ վիճակում չէ: Դա նշանակում է, որ նա այլևս չի կարող կարդալ կամ դիտել որևէ բան, վտանգված է նաև ապագայում նոր երաժշտություն ձայնագրելու նրա կարողությունը:
Էլթոն Ջոնը համբավ ձեռք բերեց 1970-ականների սկզբին՝ իր դաշնամուրային ռոք երգերով ու բալլադներով: Այդ ժամանակից նա հանրության ուշադրության կենտրոնում է: 2018-2023 թվականներին երաժիշտը հրաժեշտի շրջագայություն կատարեց:
