Մեզնով բիզնես արեցին, կռվին չմիջամտեցին, ասացին՝ հրաման չունենք. արցախցիները՝ խաղաղապահների մասին
Հայաստանի ռազմավարական դաշնակցի ուժերը Լեռնային Ղարաբաղում, պարզվում է, ոչ միայն չեն իրականացրել իրենց անմիջական պարտավորությունը ու չեն ապահովել հայերի անվտանգությունը, այլև ուրիշի դժբախտության վրա հարստանալու բավականին հաջողված փորձեր են արել:
ԼՂ-ից բռնի տեղահանված հայերը առասպելական թվերով առևտրի բազմաթիվ օրինակների մասին են պատմում: Ու դա, վստահաբար, ամենամեծ հիասթափությունը չէ:
Ռուս խաղաղապահները չկարողացան այնպես անել, որ 2020-ի նոյեմբերի 9-ի՝ հրադադար ենթադրող հայտարարությունից հետո ադրբեջանցիները ԼՂ-ում հայ չսպանեն, նոր տարածքներ չգրավեն, չկարողացան այնպես անել, որ ԼՂ-ում գոնե մի քանի հազար հայ մնա ու հիմա իրենց այնտեղ գտնվելուն ինչ-որ բացատրություն լինի, բայց այս երեք տարվա ընթացքում կարողացան այնպես անել, որ Ռուսաստանին անվերապահորեն վստահող և հավատացող արցախցիներն անգամ դառնությամբ խոսեն նրանց մասին:
Թե ինչպես էր ԼՂ-ն խոպան դարձել ռուսաստանցի սպաների համար, արցախցիները պատմել են Իրինա Մկրտչյանին:
