ԱԺ նիստին քննարկվեց ՔՊ-ական պատգամավորներ Սիսակ Գաբրիելյանի և Թագուհի Ղազարյանի ներկայացրած «Կինեմատոգրաֆիայի մասին օրենքում լրացումներ և փոփոխություններ կատարելու մասին» օրենքի նախագիծն առաջին ընթերցմամբ ընդունելու հարցը:
Խոսքը ֆիլմարտադրության հետ անմիջականորեն կապված ծախսերի մասով Cashback համակարգի ներդրման մասին է:
Հիմնական զեկուցող Սիսակ Գաբրիելյանը ներկայացրեց, թե ինչ ներդրում են պատրաստվում կատարել օրենքի նախագծով:
«Կառավարությունը կսահմանի էն ապրանքների կամ ծառայությունների ցանկը, որից օգտվելու դեպքում ֆիլմարտադրողները կստանան մինչև 20% ծախսված գումարի վերադարձ»,- ասաց պատգամավորը, ապա պարզաբանեց, որ եթե, օրինակ, ֆիլմարտադրողը նկարահանում իրականացնելիս ներառի ՀՀ-ի հետ ասոցացվող սիմվոլներ՝ պետական խորհրդանիշ, հուշարձան, պատմամշակութային որևէ ժառանգություն, ապա դա կհամարվի ծառայությունների մատուցում, և նկարահանման համար վճարված գումարի մի մասը կվերադարձվի:
Սիսակ Գաբրիելյանը կարծում է, որ օրենքի ընդունման դեպքում Հայաստանում կգրանցվի ֆիլմարտադրության աճ, քանի որ Հայաստանի բնակլիմայական պայմանները հարմար են ֆիլմ արտադրելու համար, տարածքը փոքր է, ինչպես նաև բոլոր եղանակներին կարելի է տեղում նկարահանում իրականացնել:
«Մեծ հետաքրքրվածություն կա Հնդկաստանի կողմից Հայաստանում ֆիլմ նկարելու, ինչպես նաև` Միացյալ Նահանգներից»,- ասաց պատգամավորը և տեղեկացրեց, որ արդեն կան որոշակի պայմանավորվածություններ:
