2022 թվականի համար նախանշված բարձր տնտեսական աճի հիմքում ընկած է մեծածավալ պետական ներդրումների իրականացումը ենթակառուցվածքներում և մարդկային կապիտալի զարգացմանն ուղղված ոլորտներում: Այս մասին ԱԺ նիստի ընթացքում հայտնեց ԿԲ նախագահ Մարտին Գալստյանը:
«Տնտեսական ներուժի վրա ազդեցության տեսանկյունից կարևոր ենք համարում ներդրումների խրախուսման և արտահանման խթանման ուղղությամբ նախատեսված միջոցառումների և գործողությունների առավել հստակ նկարագրումն ու քննարկումը բյուջեի ծրագրի շրջանակներում»,- ասաց Գալստյանը:
Գալստյանի խոսքով՝ 2022 թվականին ակնկալվում է, որ հարկեր-ՀՆԱ ցուցանիշը էական՝ 0.9 տոկոսային կետով աճ կունենա, որի պայմաններում պետական բյուջեի եկամուտները համախառն պահանջարկի վրա կունենան զսպող ազդեցություն:
«Գնահատվում է, որ 2022 թվականի պետական բյուջեի նախագծով նախանշված սահուն կոնսոլիդացիայի վարքագիծը և սահմանված հարկաբյուջետային կանոնների պահպանումը կնպաստեն ՀՀ պետական պարտքի բեռի նվազեցմանը և մակրոտնտեսական կայունության ապահովմանը»,- ասաց Գալստյանը:
