Արդյունաբերական կանեփ աճեցնելու կառավարության որոշումից շատ չանցած ներդրումների առաջարկներ կան

Հայաստանում արդյունաբերական կանեփ աճեցնելու կառավարության ծրագիրն ընդունվելուց շատ չանցած՝ արտասահմանից արդեն ներդրումների առաջարկներ կան։

Վարսիկ Մարտիրոսյան (ՀՀ էկոնոմիկայի նախարարության գյուղատնտեսության առաջնային արտադրանքի վարչության պետի տեղակալ) - Մասնավորապես արտասահմանում կան հայեր, որոնք տվյալ բիզնեսը իրականացնում են և բավականին հաջողել են, նրանք պատրաստ են ամբողջ ներդրումները իրականացնել, միայն անհրաժեշտ է համապատասխան օրենսդրական դաշտ լինի։

Օրենսդրական փոփոխություններն ու վերահսկման խիստ պայմանները միջգերատեսչական հանձնաժողովում քննարկել են։ Արդյունաբերական կանեփը, որն աշխարհում անվանում են հեմփ, բացարձակ կապ չունի թմրաներգործող կանեփի հետ՝ ասում է էկոնոմիկայի նախարարության պատասխանատուն։

Վարսիկ Մարտիրոսյան - Հոգեներգործուն նյութը, որը առկա է կանեփի մեջ, տետրահիդրոկանաբինոլն է։ Արտադրական կանեփի մեջ տետրահիդրոկանաբինոլի պարունակությունը յուրաքանչյուր երկրում սահմանված քանակություն է թույլատրված՝ 0,2 կամ 0,3 տոկոս, դրանից ավելի տետրահիդրոկանաբինոլ պարունակող կանեփ չի մշակվում։

Արդյունաբերական կանեփ արտադրում է 47 երկիր։ Կանեփի տարբեր տեսակներից ստացվում է կանաբիդոլ յուղ, շինանյութ, թել, սննդային ձեթ։ Բոլոր տեսակների մեջ տետրահիդրոկանաբինոլ հոգեներգործուն նյութի տոկոսը ցածր է: Արդյունաբերական կանեփը համարվում է անթափոն, բարձրարժեք մշակաբույս, այն ունի նաև բնապահպանական նշանակություն։ Մշակաբույսը հիմնականում աճեցնում են այն երկրներում, որտեղ հողերն աղտոտված են:

Նախատեսված է, որ Հայաստանում արդյունաբերական կանեփի ցանքատարածքներ կարող են լինել լեռնային և նախալեռնային գոտիներում։ Ամեն ֆերմեր չի կարող արդյունաբերական կանեփ ցանել: Ով կզբաղվի մշակաբույսի աճեցմամբ, նա էլ կկազմակերպի վերջնական արտադրանքի վերամշակումը։ Պարտադիր է հավաստագիրը։ Այս տարի գիտաարտադրական նպատակով հեմփի սերմերը նախ կցանեն ջերմոցային պայմաններում։