Ֆրանսիայում, Իսպանիայում և Բելգիայում արդեն 2 շաբաթից ավել շարունակվող ուսանողական ցույցերի ֆոնին բողոքի ակցիաներ են սկսել նաև հունական համալսարանների ուսանողները: Աթենքում ցուցարարները վրաններ են տեղադրել Խորհրդարանի շենքի դիմաց: Նրանք բողոքում են բնակարանային և կրթական վճարների բարձրացման, դասագրքերի ու ուսումնական պարագաների արժեքների, նաև էներգակիրների գնի աճի դեմ։ Տեղական ԶԼՄ-ները հայտնում են, որ ուսանողների շրջանում վարձով բնակարանների պահանջարկն այնքան է մեծացել, որ շուկայում առաջարկի պակաս և գների բարձրացում է նկատվում:
Ուսանողական միությունների տվյալով՝ այն ուսանողները, որոնք ի վիճակի չեն հոգալ վարձակալության և կրթության հետ կապված ծախսերը, ստիպված են հրաժարվել համալսարաններ ընդունվելուց կամ ընդհատել ուսումը։
Բողոքի ակցիաներ են նաև Ալբանիայում: Տիրանայում ուսանողները աղյուսներ են նետել կրթության նախարարության շենքի ուղղությամբ, ոստիկանությունը արցունքաբեր գազ և ջրցան մեքենաներ է կիրառել: Կան ձերբակալվածներ:
Ցույցերի կազմակերպիչները հայտարարել են, որ բողոքում են համալսարաններում պայմանների, բարձր վարձավճարների, աշխատաշուկայի ծանրաբեռնվածության դեմ։
Ալբանիայի փոխվարչապետ Ալբանա Կոչիուն հայտարարել է, որ բռնությունը լուծում չէ: «Քարեր նետելը, հանրային գույքի անիմաստ ոչնչացումը այն եղանակը չեն, որով երիտասարդները պետք է արտահայտեն իրենց դիրքորոշումը»,- նշել է պաշտոնյան։
Մանրամասները՝ միջազգային տեսաշարում:
