ՌԴ-ն և Չինաստանը արձագանքել են միջուկային զենքի փորձարկումները վերսկսելու Թրամփի որոշմանը

Դոնալդ Թրամփը Միացյալ Նահանգների զինված ուժերին հրահանգել է 30-ամյա ընդմիջումից հետո վերսկսել միջուկային զենքի փորձարկումները՝ դա պատճառաբանելով Ռուսաստանի և Չինաստանի հետ համաքայլ գնալու անհրաժեշտությամբ:

«Մյուս երկրների փորձարկման ծրագրերի պատճառով ես Պատերազմի նախարարությանը հանձնարարել եմ սկսել մեր միջուկային զենքի փորձարկումները հավասար հիմունքներով։ Այդ գործընթացը կսկսվի անմիջապես»,- գրել է նա Truth Social հարթակում Չինաստանի նախագահի հետ հանդիպումից առաջ։

Թրամփի խոսքով՝ Միացյալ Նահանգներն ավելի շատ միջուկային զենք ունի, քան որևէ այլ երկիր, ինչպես նաև արդիականացրել է միջուկային զինանոցն իր նախագահության առաջին ժամկետում:

«Ռուսաստանը երկրորդն է, իսկ Չինաստանը՝ երրորդը»,- հավելել է նա:

ԱՄՆ-ը վերջին անգամ միջուկային զենքի փորձարկում է անցկացրել 1992 թվականին:

Չինաստանի արտգործնախարարությունը հույս է հայտնել, որ ԱՄՆ-ն կհետևի միջուկային փորձարկումների մորատորիումի վերաբերյալ իր հանձնառությանը և փորձարկումների արգելման մասին պայմանագրով ստանձնած պարտավորություններին:

Ռուսաստանն իր հերթին շեշտել է, որ «Բուրեվեստնիկ» հրթիռի փորձարկումը, որն ավելի վաղ քննադատել էր Թրամփը, միջուկային փորձարկում է, որի նկատմամբ մորատորիում է սահմանված: Կրեմլի խոսնակ Դմիտրի Պեսկովը հույս է հայտնել, որ «Բուրեվեստնիկ» հրթիռի և «Պոսեյդոն» ստորջրյա սարքի փորձարկումների մասին տեղեկատվությունը ճիշտ կերպով է ներկայացվել ԱՄՆ նախագահին: Պեսկովի խոսքով՝ Մոսկվան հետևում է միջուկային փորձարկումների միջազգային մորատորիումի հնարավոր խախտումներին, և եթե նման բան տեղի ունենա, ապա համարժեք գործողություններ կձեռնարկի: Նա հավելել է, որ Մոսկվան Վաշինգտոնից ծանուցում չի ստացել միջուկային զենքի փորձարկումը վերսկսելու մասին:

Միջազգային զարգացումները՝ Սյուզաննա Չրաղյանի տեսաշարում: