Որևէ մեկի մտքի ծայրով չանցնի, որ կարողանալու են նոր հողազավթումներ անել. Տիգրան Ավինյանի անդրադարձը Կենտրոնում ծառահատման դեպքին
Կենտրոն վարչական շրջանում օրերս արձանագրված ծառահատման դեպքի առնչությամբ բնակիչներն ահազանգել են Երևանի քաղաքապետարանի թեժ գիծ, սակայն տեխնիկական խնդրի պատճառով պատասխանատուները արագ չեն արձագանքել: Քաղաքապետարանում այսօր կայացած խորհրդակցության ընթացքում փոխքաղաքապետ Տիգրան Ավինյանը դժգոհել է թեժ գծի աշխատանքից ու հանձնարարել ծառայողական քննություն սկսել:
«Տեխնիկական խնդրի պատճառով ստացվում է այնպես, որ հաստաբուն ծառերը՝ բարդիները, հատվել են: Ես վստահ եմ, որ ուղղակի այնպես չեն այդ ծառերը հատվել. մեկի մտքով անցել է, որ այդ տարածքն ինքը կարողանալու է զավթել, և, առհասարակ, եթե այդ հատվածում որևէ այլ ցանկապատված տարածք կլինի՝ կմաքրեք ամբողջը: Որևէ մեկի մտքի ծայրով չանցնի, թե իրենք այս մեթոդով նոր հողազավթումներ են կարողանալու անել: Թեժ գծին եկած զանգերից կարևոր բան չկա, և դրանք պետք է արագ արձագանք ստանան»,- ընդգծել է Տիգրան Ավինյանը:
