Կառավարության գործողություններն ուղղված են նրան, որ առավել խոցելի խավը ևս զգա տնտեսական աճը
Կառավարության գործողություններն ու ծրագրերը ուղղված են նրան, որ անգամ գնաճի պայմաններում, ֆինանսական միջոցների վերաբաշխմամբ, առավել խոցելի խավը ևս կարողանա զգալ տնտեսական աճի արդյունքը: Էկոնոմիկայի նախարարի խոսքով՝ 2023-ի բյուջեում այդ անելիքները նախանշվել են:
Վահան Քերոբյան (ՀՀ Էկոնոմիկայի նախարար) - Կառավարությունը նաև գերակատարում է պետական եկամուտների հավաքման իր պլանը և ավելացված միջոցներն անմիջապես ուղղվում են կարիքների բավարարմանը: Մեր աշխատանքի արդյունքը պետք է լինի մարդկանց ավելի լավ ապրելը, որի ուղղությամբ ամենօրյա աշխատանք ենք տանում:
Նախարարի խոսքով՝ դրական են դիտարկում Վարշավայի ֆոնդային բորսայի կողմից Հայաստանի ֆոնդային բորսայի բաժնետամոսերի զգալի մասի ձեռքբերումը՝ հաշվի առնելով, որ Վարշավայի ֆոնդային բորսան Արևելյան Եվրոպայի ամենակայացած և ամենաակտիվներից մեկն է, և այդ փորձի ներդրումը հայկական կապիտալի շուկայում կարևոր է:
Վահան Քերոբյան - Էս տարի մենք տեսնում ենք զգալի հետաքրքրություն մասնավոր ընկերությունների կողմից կապիտալի շուկայի գործիքների նկատմամբ: Էն ընկերությունների քանակը, որ պատշաճ աուդիտ են անցնում, էապես մեծանում է, և հենց այն ընկերությունների բազան է, որ պետք լինեն կապիտալի շուկայի առաջին մասնակիցները, հարյուրավոր ընկերություններ կան:
Քերոբյանը նշեց, լայն է սփյուռքահայ ներդրողների հետաքրքրությունը: Անցկացվել է սփյուռքի պարտատոմսերի հնարավոր թողարկման վերաբերյալ հարցում. մոտ 2000 մասնակցից 74 տոկոսը հայտնել է, որ հետաքրքրված է այդ ոլորտում ներդրումներով: Հարցման արդյունքը ներկայացվել է վարչապետի աշխատակազմ:
Վահան Քերոբյան - Արդեն սփյուռքի կողմից տեսնում ենք զգալի ներդրումներ, հիմնականում ԱՄՆ-ից, Ֆրանսիայից, Եվրոպայից, նաև Մերձավոր Արևելքից: Նաև Եվրոպական երկրներից, Ռուսաստանից ոչ սփյուռքահայերը, այլազգիները: Ներդրումային միջավայրը խոստումնալից է: Անցած տարի ունեցել ենք ներդրումային ռեկորդային ցուցանիշ՝ մեկ տրիլիոն 430 մլրդ դրամ, դա այն թիվն է, որ երբևէ չի եղել:
Ինչ վերաբերում է ոռոգման սեզոնի հնարավոր խնդիրներին՝ Քերոբյանը հիշեցրեց ջրամբարների կառուցման ծրագրերը, ընդգծեց նաև՝ ջրամբարների լցվածության այս տարվա տվյալներն առավել հուսադրող են նախորդ տարվա համեմատ, և ակնկալվում է՝ գյուղացին ջրի հետ կապված ավելի քիչ խնդիր կունենա:
