Այսօր Սևանում արդյունագործական նպատակով ձկնորսական նավակներ լիճ դուրս չեն եկել: Որսաշրջանի ժամկետն է լրացել, սակայն ըստ շրջակա միջավայրի նախարարի՝ այն կարող է շարունակվել:
Ռոմանոս Պետրոսյան (ՀՀ շրջակա միջավայրի նախարար) - Ժամկետը սահմանված էր մինչև սեպտեմբերի 1-ը: Սակայն վերջին մի քանի օրերի մեր շրջայցերի արդյունքներով` տեսանք, որ քվոտավորված 250 տոննայից հայտավորվել էին 220-ը, և այդ հայտավորվածներից ևս 20-25 տոննա դեռևս չէր որսացվել:
Արդյունագործական նպատակով որսալու ձկան պաշար Սևանում դեռ կա, Գիտությունների ազգային ակադեմիայի եզրակացությունն է մեջբերում նախարար Պետրոսյանը: Դեռ կարելի է ևս 50 տոննա ձուկ հանել լճից ու միաժամանակ երկարաձգել արդյունագործական նպատակով ձկան որսը: Թույլտվության խնդրանքով նախարարություն էին դիմել նաև ձկնորսները:
Ռոմանոս Պետրոսյան - Կարող ենք ևս 50 տոննա քվոտավորել, ժամկետների առումով էլ կարող ենք երկարաձգել ժամկետները՝ թույլ տալով դրանով բարեխիղճ ձկնորսներին մինչև հոկտեմբերի 15-ը իրականացնելու չորսված քանակների որսը:
Այս տարի «Սևան» ազգային պարկը 303 ձկնորսի հետ պայմանագիր է կնքել, որսի են դուրս եկել 277-ը, այս հանգամանքը ևս նպաստել է, որ Սևանից քիչ սիգ որսան: Սևանում սիգի ծավալների ավելացմանը նպաստել է նաև տարեսկզբին ձկան ձվադրման ժամանակ սահմանված խիստ հսկողությունը:
Նորիկ Բադալյան («Սևան» ազգային պարկի ձկնաբան) - Մեր կողմից անցյալ տարի բավական մեծ աշխատանք իրականացվեց պահպանության հարցով, արդյունքը եղավ այն, որ հիմա մենք ունեցանք նորմալ որսաշրջան և նորմալ ձուկ:
Արման Աբելյան («Սևան» ազգային պարկի տնօրեն) - Որսվել է 201,5 տոննա սիգ տեսակի ձուկ ընդհանուր 19 կահավորված կետերից: Հիմա ազգային պարկում պայքարում են մանրաձկան որսի դեմ: Ամեն օր լիճ դուրս եկող պահնորդները սահմանված չափից մանր ցանցեր են դուրս բերում:
Պողոս Մարտիրոսյան («Սևան» ազգային պարկի արագ արձագանքման խմբի ղեկավար) - Հայտնաբերվել են 44 ցանցավանդակներ, որոնք ոչնչացման նպատակով հանձնվել են պահեստներ:
Արդյունագործական որսի ժամկետի երկարաձգման ու սահմանված քանակից ավելի որսի թույլտվության հարցը դեռ կքննարկվի կառավարությունում:
