Ազատության հրապարակի ստորգետնյա ավտոկայանատեղին արդիականացվել է

Ի՞նչ նոր սարքերով-ծառայություններով է արդիականցվել Օպերայի ստորգետնյա ավտոկայանատեղին՝ տեսնելու է գնացել Երևանի քաղաքապետը։ Հայկ Մարությանին առաջինը ցույց են տվել մեքենաների հոսքին հետևող՝ Հայաստանում արտադրված վճարային  տերմինալը։

Սարգիս Աբրահամյան (սպասարկող ընկերության աշխատակից) - Մյուսներից առանձնանում է նրանով, որ ընդունում է թղթադրամ ու մետաղադրամ և մանր է տալիս:

Տերմինալը գումար է ընդունում և՛ սովորական, և՛ Wi-Fi-ով աշխատող բանկային քարտերից։ Ազատության հրապարակի տակ  մեքենան կայանողները վստահեցնում են՝ սարքից օգտվելը շատ հեշտ է։

Համակարգը մեքենան ճանաչում է ըստ պետհարամանիշի։ Ավտոմատ է հաշվում՝ ավտոն որքա՞ն ժամանակ է տարածքում կանգնած  մնացել, ինչքա՞ն գումար պետք է վճարվի։ Քաղաքապետ Մարությանը տերմինալը փորձարկելու գայթակղությանը չդիմացավ։

Ստորգետնյա այս կայանատեղիի 3 հարկերում 6 նման տերմինալ կա։ Օգտվեք դրանցից, որ և՛ հերթում չսպասեք, և՛ վճարման վրա  գումար խնայեք՝ վարորդներին հուշում է քաղաքապետը։

Հայկ Մարության (Երևանի քաղաքապետ) - Խնդրում եմ մեր քաղաքացիներին՝ օգտվել վճարման հենց այս ձևից, քանի որ մենք  ունենք մյուսը, բայց սա ավելի էժան է:

Տերմինալով վճարելու դեպքում՝ մեկ ժամ կայանման սակագինը ցերեկը 200, գիշերը՝ 100 դրամ է։ Կարելի է նաև՝ միանգամից ամսվա  համար կտրոն վերցնել։

Սարգիս Աբրահամյան - Մեկ ժամի արժեքը 200 դրամ է, ամսա աբոնեմենտը՝ 20 հազար դրամ՝ ամբողջ օրվա համար:

Անվճար  է էլեկտրամոբիլների լիցքավորումը․ այդ սարքերն էլ են տեղադրված։ 500 մեքենայի համար գործող կայանատեղին, ի դեպ, մասնավոր չէ․ Երևանի սեփականությունն է։ Գանձվող ամբողջ գումարը համայնաքային բյուջե է գնում։