Որքան հավանականություն կա արժեզրկման, այնքան էլ՝ արժևորման. ԿԲ փոխնախագահը՝ փոխարժեքի տատանումների մասին
Փոխարժեքը պետք է լինի ավելի տատանողական, քան գնաճը, ուստի փոխարժեքի և՛ արժեզրկում, և՛ արժեվորում հնարավոր է: Այդ մասին ԱԺ ֆինանսավարկային և բյուջետային հարցերի մշտական հանձնաժողովի նիստում ասաց ԿԲ նախագահի տեղակալ Ներսես Երիցյանը:
«Դրամի փոխարժեքը հիմա արժևորվում է և ոչ թե կայունանում, և չեմ կարող ասել՝ ինչքան կարժևորվի, վաղը ինչքան կարժեզրկվի. դրանք կախված են ֆինանսական շուկայի պայմաններից, սպասումներից»,- նշեց Երիցյանը՝ հավելելով. «Որքան հավանականություն կա փոխարժեքի արժեզրկման, այնքան հավանականություն կա նաև արժևորման»:
Նրա խոսքով՝ երկարաժամկետ իմաստով փոխարժեքներն էապես բարելավվում են, շուկաներում չեն կարող լինել վայրիվերումներ:
