Հովտաշենում փորձարկել են կենսահավելումներով բույսեր աճեցնելու նոր տարբերակը
Գյուղատնտեսություն առանց հողի՝ սա ապրիլմեկյան կատակ չէ: Տարբերակը փորձարկել է հովտաշենցի ջերմոցատերը։
Բախշիկ Մկրտչյան (ջերմոցատեր) - Սա մեր ստացած վարունգներն ենք, իսկ սա սովորական մեր հողի մեջ դրած վարունգներն են:
Ե՛վ հողում, և՛ նոր միջավայրում երկու սածիլներն էլ միաժամանակ նույն օրն են տնկել, սակայն բերքը ստացել են տարբեր ժամկետում: Ջերմոցատերը վստահեցնում է՝ նոր օրգանական խառնուրդում բերքը 15 օր ավելի շուտ է աճել, քան սովորական հողինը: Բացի այդ, բույսն ավելի դիմացկուն է հիվանդությունների նկատմամբ:
Բախշիկ Մկրտչյան - Կարելի է հող չօգտագործել, դաժե չբերրի հողերի վրա ունենալ ջերմոց։
Ակնհայտ է նաև լոլիկի աճի տարբերությունը: Օրգանական պարարտանյութերի նոր խառնուրդ ստեղծելու առաջարկն արտադրող ընկերությունը ստացել է այն հողատերերից, որոնք իրենց տարբեր մշակաբույսեր են աճեցրել, սակայն արդյունք չեն ունեցել։ Այս միջավայրը միանգամայն տարբերվում է նաև հիդրոպոնիկ տարբերակից։ Հողի փոխարեն արտադրողին առաջարկվում է բույսն աճեցնել օրգանական պարարտանյութերի խառնուրդի փոքրիկ պարկերում։
Լուսինե Նալբանդյան (օրգանական պարարտանյութեր արտադրող ընկերության տնօրեն) - Այս պահի դրությամբ փորձերն իրականացվել են յուրաքանչյուր բույսի համար մեկ պարկ 20 լիտր ծավալով։ Բայց պարկը կարող է լինել ավելի փոքրածավալ։
Փոքրիկ պարկն ամբողջությամբ բավարար է բույսի աճեցման մեկ սեզոնի համար։ Օգտագործումից հետո այն կարելի է կիրառել այգու պարարտացման նպատակով։
Լուսինե Նալբանդյան - Բաղադրությունը իրենից ենթադրում է մեր կողմից 10 տարվա ընթացքում արտադրած օրգանական պարարտանյութերի խառնուրդը, դրան ավելացվել է նաև ագրոպեռլիտ, պեմզա, մեր կենսահումուսը, օրգանոմիքսը, մեր սուպերկոմպոստը, բացի դրանից, ունենք էֆեկտիվ միկրոօրգանիզմների գեղեցիկ փունջ։
Արտադրողը վստահեցնում է՝ օրգանական պարարտանյութերի խառնուրդի մեկ պարկի արժեքն այնքան կլինի, որ ֆերմերները դժգոհ չմնան։
