Քրեադատավարական պրոցեսները քաղաքականացնելու փորձերն անիմաստ են. դատախազի խորհրդական
«Եվս մեկ անգամ կրկնում ենք. չի կարող լինել որևէ պատգամավորի, այդ թվում նաև Գագիկ Ծառուկյանին անձեռնմխելիությունից զրկելու միջնորդություն ներկայացնելու քաղաքական որոշում»,- հայտարարել է ՀՀ գլխավոր դատախազի խորհրդական Գոռ Աբրահամյանը Ֆեյսբուքի էջում:
Դատախազի խորհրդականը հավելել է. «Նման որոշումները կայացվում են բացառապես քրեական դատավարության շրջանակներում՝ ելնելով նրանից, թե որքանով է գլխավոր դատախազը քննության ընթացքում հավաքված ապացույցները բավարար կամ անբարարար գնահատում նման միջնորդության հիմնավորվածության տեսանկյունից:
Հետևաբար անիմաստ են, իրադարձություններից առաջ ընկնելով, բացառապես քրեադատավարական պրոցեսները քաղաքականացնելու փորձերը:
Եթե նման հարցով Ազգային ժողովին միջնորդություն ներկայացվելու դատավարական հիմքերը լինեն, դատախազությունը հանրությանը կտեղեկացնի այդ մասին»:
Հիշեցնենք՝ ԱԺ ԲՀԿ խմբակցության ղեկավար Գագիկ Ծառուկյանը երեկ հարցաքննվել է ԱԱԾ-ում հարուցված քրեական գործերի շրջանակներում:
