Եվրամիության երկրների արտաքին գործերի նախարարները հունվարին քննարկում կանցկացնեն Վրաստանի նկատմամբ նոր միջոցների վերաբերյալ, որոնք ուղղված են ժողովրդավարությունից Թբիլիսիի հետագա շրջադարձը կանխելուն՝ հայտարարել է ԵՄ-ի արտաքին քաղաքականության ղեկավար Կայա Կալասը։
«Վրաստանի կառավարությունն այժմ շարժվում է դեպի Եվրամիության հետ բախում՝ ժողովրդավարական հետընթացի պատճառով։ Դա միանգամայն պարզ է։ Այն քայլերը, որոնք ձեռնարկվել են, այժմ սխալ ուղղությամբ են տանում»,– ասել է պաշտոնյան։
Պատասխանելով հարցին, թե արդյոք նոր պատժամիջոցներ կառաջարկվեն Վրաստանի կառավարության դեմ, Կալասն ասել է, որ դեռ վաղ է խոսել այդ մասին, քանի որ հունվարին նախատեսված քննարկումը կոչված է համաձայնեցնելու տարբեր դիրքորոշումներ։
«Մեզ համար ամենակարևորն այն է, թե ինչպես ցույց տալ, որ մենք աջակցում ենք վրաց ժողովրդին և նրա ձգտմանը՝ լինելու Եվրամիության մաս, բայց միևնույն ժամանակ հստակ ազդակներ ուղարկել կառավարությանը, որ մենք չենք աջակցում նման քաղաքականությանը»,– նշել է Կալասը։
