Աֆրիկյան երկրները ձգտում են վերադարձնել ռուսական կողմից ռազմական գործողությունների ժամանակ Ուկրաինայում գերի վերցված իրենց քաղաքացիներին՝ հաղորդել է Bloomberg-ը։ Քենիայի արտաքին գործերի նախարար Մուսալիա Մուդավադին Նայրոբիում խորհրդարանին տեղեկացրել է, որ երկրի իշխանությունները բանակցություններ են վարում հինգ քենիացու վերադարձի համար։
Ավելի վաղ Բոցվանայի ԱԳՆ-ն Bloomberg-ին հայտնել էր, որ ձգտում է վերադարձնել իր քաղաքացիներից մեկին ուկրաինական ռազմագերիների ճամբարից։
Աֆրիկյան երկրները հայտարարում են, որ իրենց քաղաքացիներից մի քանիսին խաբեությամբ Ռուսաստան են բերել, ապա ստիպել անցնել զինվորական ծառայության: Այդ երկրների իշխանությունների տվյալներով՝ տղամարդկանց քաղաքացիական աշխատանք են խոստացել, այդ թվում ՝ վարորդի, անվտանգության աշխատակցի կամ խոհարարի։
Քենիայի ԱԳ նախարարը ձգտում է, որ ուկրաինական գերության մեջ գտնվող տղամարդիկ ճանաչվեն «մարդկանց միջազգային առևտրի զոհեր», այլ ոչ թե ռազմագերիներ:
Ուկրաինայի կառավարության կայքում տեղադրված տվյալների համաձայն՝ Ռուսաստանը 135 երկրից ավելի քան 28000 օտարերկրյա քաղաքացի է հավաքագրել հակամարտությանը մասնակցելու համար, որոնցից ավելի քան 5000-ը զոհվել են։ Ուկրաինայի իշխանությունները հայտնում են, որ իրենց ուժերը գերի են վերցրել 51 երկրի զինյալների։
Bloomberg-ի ուսումնասիրած փաստաթղթերի համաձայն՝ Ուկրաինան ռազմագերի է պահում առնվազն 213 օտարերկրյա քաղաքացու՝ չհաշված ռուսաստանցիներին ու հյուսիսկորեացիներին։ Նրանցից 37-ն աֆրիկյան երկրների քաղաքացիներ են։
