Ադրբեջանի գլխավոր դատախազ Քամրան Ալիևը Ռուսաստան կատարած պաշտոնական այցի շրջանակում հանդիպել է ՌԴ գլխավոր դատախազ Ալեքսանդր Գուցանի հետ:
Ալիևը նշել է, որ երկու երկրի իրավապահ մարմինների փոխգործակցությունը հիմք է ստեղծում հետագա գործնական համագործակցության համար: Նրա խոսքով՝ երկու երկրի դատախազությունների փոխգործակցությունը զարգանում է երկու հիմնական ուղղությամբ՝ իրավակիրառման և օրենսդրության ոլորտում փորձի փոխանակում, ինչպես նաև կոնկրետ քրեական գործերով իրավական օգնության ցուցաբերում և հանցագործություն կատարած անձանց հանձնում:
Գուցանն իր հերթին նշել է Ադրբեջանի և Ռուսաստանի դատախազությունների միջև փոխգործակցության ավանդաբար բարձր մակարդակը և հանդես է եկել համագործակցության ընդլայնման օգտին:
Կողմերը քննարկել են նաև կոնկրետ քրեական գործեր։ Հանդիպման ավարտին երկու երկրների գլխավոր դատախազությունները ստորագրել են 2027-2028թթ. համագործակցության ծրագիրը: Փաստաթուղթը նախատեսում է փոխգործակցության հետագա զարգացում և փոխադարձ հետաքրքրություն ներկայացնող ուղղություններով փորձի փոխանակում:
