Եվրամիությունում ԱՄՆ մշտական ներկայացուցիչ Էնդրյու Փազդերը կարծում է, որ ԵՄ ռազմականացման ընթացքում հիմնականում եվրոպական զենք գնելու պահանջը կխաթարի անդրատլանտյան միասնությունը։ Նա այս մասին հայտարարել է Բրյուսելում՝ ելույթ ունենալով ռազմատիեզերական համաժողովում։
Նա կոչ է արել կենտրոնանալ զենքի որակի և մատչելիության վրա, այլ ոչ թե՝ «արտադրության վայրի»։ Փազդերն ընդգծել է, որ Եվրոպայում ռազմական գնումների գործընթացում պետք է հրաժարվել «Գնիր եվրոպականը» սկզբունքից և փոխարեն հավատարիմ մնալ «Գնիր ՆԱՏՕ-ի արտադրանքը» սկզբունքին:
Հենց այս սկզբունքն է գործել Եվրոպայում տասնամյակներ շարունակ՝ ամերիկյան ռազմական ընկերություններին ապահովելով գերիշխող դիրք եվրոպական շուկայում։ Սակայն, Եվրահանձնաժողովը, ԵՄ ռազմականացման ֆինանսավորման բազմաթիվ համաեվրոպական ծրագրերի միջոցով, որոնց ընդհանուր արժեքը կազմում է մոտ 1,5 տրիլիոն եվրո, այժմ ձգտում է այդ ֆինանսական հոսքերը վերաուղղորդել բացառապես եվրոպական արդյունաբերություն՝ տարբեր սահմանափակումներ մտցնելով։
