Սաուդյան Արաբիայի, Պակիստանի ու Թուրքիայի ռազմական ներկայացուցիչները քննարկել են Էր Ռիադի առջև ծառացած սպառնալիքները
Էր Ռիադում հանդիպել են Սաուդյան Արաբիայի, Պակիստանի ու Թուրքիայի ռազմական ներկայացուցիչները: Նշվում է, որ կողմերը քննարկել են Սաուդյան Արաբիայի առջև ծառացած սպառնալիքները, պայմանավորվել ջանքեր գործադրել Թագավորության դեմ հարձակումներին դիմակայելու համար։
Վերջին շրջանում Իրանի աջակցությունը վայելող Եմենի հութիների և Սաուդյան Արաբիայի միջև լարվածությունը սրվել է՝ փոխադարձ հարվածներ, ավերածություններ, զոհեր: Տուժել է նաև Սաուդյան Արաբիայի էներգետիկ ենթակառուցվածքը:
Էր Ռիադի հանդիպումը կայացել է Մեքքայի համաձայնագրի շրջանակում, որը վերջերս ստորագրել էին Սաուդյան Արաբիան, Պակիստանը և Թուրքիան: Կողմերն ընդգծում են, որ փաստաթղթի նպատակն է ստեղծել բացառապես պաշտպանական դաշինք և մշակել զսպման մեխանիզմներ:
Հատկանշական է, որ լրատվամիջոցները Մեքքայի համաձայնագիրն անվանում են «մուսուլմանական ՆԱՏՕ»: Դրա հիմնական դրույթներից է հավաքական պաշտպանության սկզբունքը, որի համաձայն՝ կողմերից մեկի վրա զինված հարձակումը կհամարվի հարձակում բոլոր կողմերի վրա։
Դիտումներ44
