Անկարայի քաղաքապետը դուրս է եկել ընդդիմադիր Ժողովրդահանրապետական կուսակցությունից
Անկարայի քաղաքապետ Մանսուր Յավաշը հայտարարել է ընդդիմադիր Ժողովրդահանրապետական կուսակցությունից (CHP) հեռանալու և իր քաղաքական գործունեությունը որպես անկախ քաղաքական գործիչ շարունակելու մտադրության մասին։
Նա հղում է կատարել ընդդիմության ներսում երկարատև և լուրջ տարաձայնություններին, բազմիցս զգուշացրել է, որ ամիսներ շարունակ քննարկումներն ու բանավեճերը, մասնավորապես՝ կուսակցության համագումարի որոշումների անվավերության վերաբերյալ դատավարության շուրջ, կարող են հանգեցնել կուսակցության ներսում «խոր պառակտման» և վնասել «Թուրքիայում ժողովրդավարական քաղաքականության հույսերին»։
Յավաշը նախկինում բազմիցս հերքել էր այլ կուսակցություն անցնելու հնարավորության մասին տեղեկությունները։ Միաժամանակ նա ընդգծել է, որ շարունակելու է աշխատել Անկարայի քաղաքապետի պաշտոնում՝ անկախ քաղաքական պատկանելությունից։
Մանսուր Յավաշը Թուրքիայի նախագահի հնարավոր թեկնածուներից է։ Նրա անունը վերջին շրջանում հաճախ է շրջանառվել՝ որպես ընդդիմության հնարավոր թեկնածու նախագահի առաջիկա ընտրությունում:
Դիտումներ89
