Սեպտեմբերի 19-25-ը Դիլիջանում անցկացվող նախաձեռնությունը մեկ հարթակում համախմբում է պետական կառույցների, միջազգային կազմակերպությունների, գործարար հատվածի, երիտասարդության և տեղական համայնքի ներկայացուցիչներին՝ կենսաբազմազանության պահպանության համաշխարհային առաջնահերթությունները տեղական մակարդակում գործնական քայլերի վերածելու նպատակով։
Միջոցառման բացմանը ողջույնի խոսքով հանդես են եկել Շրջակա միջավայրի նախարարի տեղակալներ Հայկ Առաքելյանը և Արամ Մեյմարյանը։
Առաջին օրվա ընթացքում BES-Net Armenia-ի փորձագետները ներկայացրել են էկոհամակարգային ծառայությունների, Հայաստանի կենսաբազմազանության ազգային հարթակի և գնահատման մեթոդների վերաբերյալ թեմաներ՝ անդրադառնալով նաև կենսաբազմազանության պահպանության գործում գործարար հատվածի դերին։
Շաբաթվա ընթացքում նախատեսված են վերապատրաստումներ, աշխատաժողովներ, ֆիլմերի ցուցադրություններ և բնության պահպանությանն ու կենսաբազմազանության թեմաներին նվիրված մի շարք այլ միջոցառումներ։
«COP17 Week Dilijan» նախաձեռնությունն իրականացվում է «Green Rock»-ի կողմից՝ ՄԱԿ-ի Զարգացման ծրագրի (UNDP Armenia) BES-Net նախագծի ֆինանսական աջակցությամբ և ներառված է COP17-ին ընդառաջ իրականացվող միջոցառումների շրջանակում։
