Գերիները չեն վերադառնա, եթե չլինի խաղաղությունը, և դա հողի վրա ապացուցել ենք. Արթուր Հովհաննիսյանը՝ ընդդիմության քննադատության մասին
Պետք է գաք, այստեղից պատասխան տաք ՀՀ այն քաղաքացիներին, ում տեռորի եք ենթարկել, պետք է պատասխան տաք այն քաղաքացիներին, ում տեռորի եք ենթարկել, ըստ տարածված տեղեկությունների, ՀՀ սահմաններից դուրս, որ փորձել եք օտարերկրյա ազդեցության շնորհիվ, միջոցով ՀՀ քաղաքացիներին, որոնք ապրում են Հայաստանից դուրս, փորձել եք բերել և ստիպել նրանց ընտրել՝ փողով կլինի, դրսում և այստեղ տարբեր կազամերպություններում աշխատող նրանց բարեկամներին ճնշելով կլինի և այլն: Այդ մասին Ազգային ժողովի՝ օգոստոսի 2-ի նիստին ասաց «Քաղաքացիական պայմանագիր» խմբակցության պատգամավոր Արթուր Հովհաննիսյանը:
Անդրադառնալով Ադրբեջանում պահվող մեր հայրենակիցների վերադարձին առնչվող ընդդիմադիրների հայտարարությանը, թե չկա խաղաղություն, եթե գերիները չեն վերադարձել, պատգամավորը պատասխանեց. «Ես ձեզ կասեմ հակառակը․ գերիները չեն վերադառնա, եթե չլինի խաղաղությունը, և դա մենք հողի վրա ապացուցել ենք:
Խաղաղության գործընթացը որքան ամրացել է, գերիներ են վերադարձել Հայաստան: Դուք չգիտե՞ք սա: Դուք սա գիտեք, բայց մեկ է, գալիս եք, ասում եք՝ ի՞նչ եք արել գերիների վերադարձի համար: Արել ենք այնպես, որ վերադարձել են մեր բազմաթիվ հայրենակիցներ»:
