Դուք պատիվ ունեցաք հիմք դնելու ընտրական տուրիզմին, և դրա մասին բազմաթիվ փաստեր կան. Արփի Դավոյանը՝ ընդդիմադիրներին
300 հազար ադրբեջանցիների մասին խոսույթները մարդկանց մոտ խուճապ են առաջացրել, և դրանք ընդհանրապես խոսքի ազատության հետ կապ չունեն: Այդ մասին Ազգային ժողովի՝ օգոստոսի 2-ի նիստին հայտարարեց «Քաղաքացիական պայմանագիր» խմբակցության պատգամավոր Արփի Դավոյանը՝ խոսքն ուղղելով խորհրդարանի ընդդիմադիր խմբակցություններին:
«Դուք միտումնավոր խուճապ եք առաջացրել մարդկանց մոտ, և դուք՝ որպես իրավաբան (դիմում է «Ուժեղ Հայաստան» խմբակցության պատգամավոր Արամ Վարդևանյանին), պիտի իմանաք այդ գործերի մասին. դրանք շատ կարևոր են:
Այստեղ ասում եք՝ ՍԴ-ն արձանագրեց սա, սա, սա… Այնպես եմ ցավում, որ ՍԴ-ն չի արձանագրել, որ այս տարի հիմք դրվեց նաև ընտրական տուրիզմին: Դա էլ պիտի արձանագրեր ՍԴ-ն: Գուցե ես քաղաքական գնահատական եմ տալիս, պարզ էր, որ ՍԴ-ն նման բան չէր կարող արձանագրել, բայց դուք պատիվ ունեցաք հիմք դնել ընտրական տուրիզմին, և դրա մասին բազմաթիվ փաստեր կան, պետք չէ հերքել:
Ընտրակաշառքի մասին չեմ խոսում, որովհետև այն բոլոր ձայնագրությունները, որոնք դատարաններում չեն վիճարկվել, ուղղակի հերքվում են, այդ բոլոր ձայնագրությունները խոսում են խայտառակ, աննախադեպ ընտրակաշառքների մասին»,- ասաց նա:
