Ստորագրվել է Գազայի հատվածում հրադադարի հաստատման համաձայնագիրը․ «Միասին մենք հասել ենք անհնարինին»
Եգիպտոսի և ԱՄՆ ղեկավարների համանախագահությամբ Շարմ էլ Շեյխում մեկնարկած Խաղաղության գագաթնաժողովի ընթացքում ստորագրվել է Գազայի հատվածում հրադադարի հաստատման համաձայնագիրը: Փաստաթուղթը ստորագրել են ԱՄՆ, Եգիպտոսի, Թուրքիայի և Կատարի ղեկավարները: Դոնալդ Թրամփի խոսքով՝ փաստաթուղթը սահմանում է բազմաթիվ կանոններ:
Ստորագրման արարողությանը նախորդած ելույթի ժամանակ Դոնալդ Թրամփը կրկին շնորհակալություն է հայտնել միջնորդ երկրներին: Նա նաև հիշեցրել է իր օժանդակությամբ լուծված հակամարտությունների մասին: ԱՄն նախագահը հատուկ ընդգծել է գագաթնաժողովին Հայաստանի և Ադրբեջանի ղեկավարների մասնակցությունը:
«Միասին մենք հասել ենք անհնարինին՝ վերջապես Մերձավոր Արևելքում խաղաղություն է տիրում», - նշել է նա՝ հավելելով՝ այս պահից ի վեր կկառուցենք ուժեղ, կայուն և բարգավաճ տարածաշրջան:
Ավելի վաղ Աբդել Ֆաթթահ աս-Սիսին և Դոնալդ Թրամփը զրուցել են լրագրողների հետ: Եգիպտոսի ղեկավարը Գազայում հրադադարի համաձայնագիրն անվանել է աննախադեպ ձեռքբերում: Դոնալդ Թրամփն էլ նշել է Եգիպտոսի կարևոր դերը բանակցություններում:
Նախքան գագաթնաժողովի մեկնարկը տեղի են ունեցել մի շարք հանդիպումներ: Իտալիայի վարչապետ Ջորջա Մելոնին քննարկումներ է ունեցել եվրոպական և մերձավորարևելյան երկրների ղեկավարների հետ: Հանդիպում են անցկացրել նաև Թուրքիայի, Ֆրանսիայի, Մեծ Բրիտանիայի, Գերմանիայի, Կատարի ղեկավարները:
Գագաթնաժողովին մասնակցում է նաև Պաղեստինի նախագահ Մահմուդ Աբբասը:
Իսրայելի վարչապետ Նեթանյահուն չի մեկնել Եգիպտոս՝ պատճառաբանելով ժամանակի սղությունը հրեական տոնին ընդառաջ:
Ռուսաստանի արտգործնախարար Սերգեյ Լավրովն էլ հաջողություն է մաղթել Շարմ էլ Շեյխի հանդիպման մասնակիցներին՝ շեշտելով՝ Գազայում խաղաղության վերաբերյալ Թրամփի ծրագիրը լավագույնն է, որ այժմ դրված է բանակցությունների սեղանին: Միևնույն ժամանակ, Լավրովի խոսքով, Թրամփի պլանը չի լուծում պաղեստինյան պետականության խնդիրը:
