Պաղեստինյան իսլամիստական ՀԱՄԱՍ խմբավորման ներկայացուցիչներն արձագանքել են ԱՄՆ նախագահ Դոնալդ Թրամփի՝ Գազայի հատվածում պատերազմը դադարեցնելու ծրագրին: ՀԱՄԱՍ-ը համաձայնել է ազատ արձակել բոլոր ողջ մնացած իսրայելցի պատանդներին և հանձնել մահացածների մարմինները, ինչպես նաև Գազայի հատվածի կառավարումը հանձնել պաղեստինյան կոմիտեին:
Խմբավորման հայտարարության մեջ նշվում է, որ որոշումը կայացվել է հարցի մանրակրկիտ ուսումնասիրությունից հետո։
Պատասխանն արդեն փոխանցվել է միջնորդներին։
Ավելի վաղ ՀԱՄԱՍ-ը մեկնաբանել էր Գազայում պատերազմը դադարեցնելու՝ Դոնալդ Թրամփի ծրագիրը: Պաղեստինյան շարժման քաղբյուրոյի անդամ Մոհամմեդ Նազալը հայտնել էր,որ պատրաստվում են որոշ փոփոխություններ առաջարկել:
Նազալն ընդգծել էր, որ ՀԱՄԱՍ-ի ղեկավարությունը «լուրջ է տրամադրված համաձայնության հասնելու հարցում», սակայն չի ընդունի այնպիսի գործարք, որը կստիպի պաղեստինցիներին հրաժարվել իրենց օրինական իրավունքներից:
