Թաիլանդի և Կամբոջայի միջև սահմանի վիճելի հատվածում բախումներից հետո արդեն երրորդ օրն է՝ լարվածությունը պահպանվում է: Կողմերն իրար կոչ են արել դադարեցնել ռազմական գործողությունները և նստել բանակցությունների սեղանի շուրջ: Միևնույն ժամանակ, Թաիլանդը և Կամբոջան փոխադարձ մեղադրանքներ են հնչեցրել՝ նախահարձակ լինելու համար:
Սահմանային բնակավայրերից տասնյակ հազարավոր մարդիկ են տարհանվել: Վերջին տվյալով՝ Թաիլանդում զոհերի թիվը հասնում է 19-ի, այդ թվում՝ 6 զինվորական: Մի քանի տասնյակ մարդ վիրավորվել է: Կամբոջայում պաշտոնապես հայտարարվել է 12 զոհի մասին, նրանց թվում՝ 5 զինվորական և 7 քաղաքացիական անձ: Շուրջ 70 մարդ տուժել է:
Երեկ թաիլանդական կողմը Կամբոջայի հետ սահմանի ութ նահանգում ռազմական դրություն էր հայտարարել՝ մտավախություն հայտնելով, որ բախումները կարող են վերածվել պատերազմի:
