Հայաստան-Ադրբեջան միջպետական հարաբերությունների կարգավորման գործընթացը մեծապես խորացնում է Արցախի մարտահրավերներն ու գոյաբանական վտանգները, հայտարարել է Արցախի նախագահը: Արայիկ Հարությունյանը նշել է՝ անընդունելի է Արցախի Հանրապետության ինքնիշխանությունը, ժողովրդի ինքնորոշման իրավունքը և դրա իրացման փաստն անտեսող ցանկացած հայտարարություն և փաստաթուղթ։
Արայիկ Հարությունյան (Արցախի նախագահ) - Արցախը չի եղել և չի լինելու Ադրբեջանի կազմում, քանի որ դա է մեր ժողովրդի կամքը, որն ունի բավարար վճռականություն՝ իր իրավունքների ու շահերի համար պայքարելու: Վստահ եմ, որ պայքարողը միայնակ չի մնում, և ոչ միայն համայն հայությունն է շարունակելու սատարել մեր պայքարին, այլև միջազգային դաշտում նույնպես կգտնվեն արժեքահեն աջակիցներ: Այո՛, իրավիճակը ծանր է, բայց ոչ՝ անելանելի, և Արցախի իշխանությունները կատարում և կատարելու են հնարավոր գործնական քայլերը արտաքին ու ներքին մարտահրավերներին դիմակայելու ուղղությամբ:
Արայիկ Հարությունյանը հայտարարել է՝ 163 օր շարունակ Արցախն ապրում է ադրբեջանական հանցավոր շրջափակման պայմաններում, որն ահագնացող հումանիտար աղետ է՝ լի քաղաքական մարտահրավերներով ու անվտանգային սպառնալիքներով: Այս ամենի հետ մեկտեղ աճում են Բաքվի` ռազմական նոր ագրեսիա հրահրելու և էթնիկ զտման իրականացման նկրտումները:
Ստեղծված իրավիճակում Արցախի նախագահը կոչով դիմել է Հայաստանի իշխանություններին ու քաղաքացիներին, Արցախի քաղաքացիներին և սփյուռքի հայերին:
Արայիկ Հարությունյան - Գիտակցելով հետպատերազմյան ժամանակահատվածում Հայաստանի Հանրապետության խոցելի վիճակը՝ մենք ըմբռնումով ենք մոտեցել տարբեր զարգացումների և գիտակցաբար կրել ու կրում ենք բազմաթիվ զրկանքներ չեզոքացնելու համար մեզ ճնշելու միջոցով Հայաստանի Հանրապետությանը զիջումներ պարտադրելու բոլոր փորձերը: Սակայն կան հստակ սկզբունքներ ու կարմիր գծեր, որոնց խախտումներն անընդունելի և անթույլատրելի ենք համարում: Եվ Արցախն Ադրբեջանի կազմում ճանաչելը այդ կարմիր գծերից է, որը, վստահ ենք, համայն հայության գերակշիռ մասի համար մնում է այդպիսին: Արցախին առնչվող գործողություններում ու դիրքորոշումներում Հայաստանի Հանրապետության համար գլխավոր ուղենիշը պետք է լինի Արցախի ժողովրդի կամարտահայտությունը, որն աներկբա կերպով դրսևորվել է անկախության և սահմանադրական հանրաքվեներով՝ Հայաստանի Հանրապետության և ողջ հայ ժողովրդի անվերապահ սատարմամբ: Իսկ Հայաստան-Ադրբեջան միջպետական հարաբերությունների կարգավորումը չի կարող տեղի ունենալ ադրբեջանա-ղարաբաղյան հակամարտությունից լրիվ անջատ տրամաբանությամբ և Արցախի ժողովրդի կենսական իրավունքների ու շահերի հաշվին, որոնք, ի դեպ, կազմում են համայն հայ ազգի կենսական իրավունքների ու շահերի անբաժանելի ու կարևոր մասը:
Արայիկ Հարությունյանը դիմել է Ռուսաստանի Դաշնության իշխանություններին և Վլադիմիր Պուտինին՝ պահանջելով ապահովել նոյեմբերի 9-ի եռակողմ հայտարարությամբ ստանձնած պարտավորությունները՝ բացել Լաչինի միջանցքը, ազատել Արցախի 120 հազար բնակչությանը պատանդությունից:
Արայիկ Հարությունյան - Անկախ Եռակողմ հայտարարության մյուս կողմերի գործողություններից՝ Ռուսաստանը ստանձնել է հստակ պարտավորություններ, որոնք լրջագույն հիմք են եղել պատերազմից հետո Արցախի ժողովրդի վերադարձի ապահովման համար: Ուստի, մենք ակնկալում ենք այդ պարտավորությունների անշեղ ու վճռական կատարում՝ հանուն Արցախի ժողովրդի և Ռուսաստանի դաշնության շահերի, ինչպես նաև՝ հայ ու ռուս ժողովուրդների դարավոր բարեկամության:
Արայիկ Հարությունյանը հայտարարել է, որ դադարեցնում է նախագահական և խորհրդարանական արտահերթ ընտրությունների գործընթացը. հրաժարական չի տա այնքան ժամանակ, մինչև դրա համար բարենպաստ պայմաններ չլինեն:
Արայիկ Հարությունյան - Արցախի Հանրապետությունում կառավարումը կարող է իրականացվել բացառապես Արցախի Հանրապետության Սահմանադրությամբ նախատեսված մարմինների միջոցով: Պաշտպանության պետական կոմիտե կամ կառավարման նմանօրինակ մարմիններ պարզապես չեն կարող ստեղծվել: Պատրաստ եմ բոլոր խորհրդարանական և արտախորհրդարանական ուժերի հետ համագործակցության, որոնք ունեն պետության ներքին ու արտաքին քաղաքականության առնչությամբ տեսակետներ, գաղափարներ ու առաջարկներ: Այդ համագործակցության ինստիտուցիոնալ հիմնական հարթակը Անվտանգության խորհուրդն է, որտեղ, ինչպես նախկինում, այնպես էլ հիմա կարող են իմ կողմից հրավիրվել բոլոր ուժերի ներկայացուցիչները՝ առանց բացառության: Այսպիսի ճգնաժամային ծանր պայմաններում դադարեցնում եմ արտահերթ նախագահական և խորհրդարանական ընտրություններ կազմակերպելու շուրջ բոլոր տեսակի քննարկումները, ինչպես նաև՝ վերջին օրերին Ազգային ժողովի նախագահի կողմից առաջարկված վստահության հանրաքվե կազմակերպելու շուրջ մտքերի փոխանակումները: Հորդորում եմ վերջ տալ ներքաղաքական այդօրինակ գործընթացներին, որոնք կարող են վտանգել մեր երկրի ներքին կյանքի կայունությունը, կրկին ձևավորել ճամբարներ, ինչը մերօրյա պայմաններում անընդունելի է:
Արցախի նախագահը հայտարարել է՝ սահմանափակելու է հավաքների ազատությունը, անընդունելի համարել այսպիսի վտանգների պայմաններում գործողությունները՝ առանց հաշվի առնելու Արցախի շահերն ու արցախցիների համար հետևանքները:
