Ուկրաինայից տարհանվող հայերին օգնելու համար ՀՀ դեսպանատներն աշխատում են ծանրաբեռնված
Այսօր Ռուսաստանի իրականացրած ռազմական գործողության 32-րդ օրն է: Եթե Ուկրաինայից հեռացածների թիվը բաժանենք բախման օրերին, կստացվի, որ օրական երկրից ավելի քան 112 հազար մարդ է հեռանում: 2020-ի տվյալով, Ուկրաինայի բնակչությունը 44 մլն է, նրանցից մոտ կես միլիոնը հայեր են:
Թե նրանց որ մասն է հեռացել Ուկրաինայից՝ վիճակագրություն դեռ չկա, բայց մեր հայրենակիցներին օգնելու համար լարված աշխատում են դիվանագիտական ներկայացուցչությունները թե՛ Ուկրաինայի տարածքում, թե՛ հարևան երկրներում: Իսկ արտաքին գործերի նախարարությունը գործարկել է էլեկտրոնային հյուպատոսական համակարգը, որը հնարավորություն է տալիս վավերականության ժամկետը լրացած անձնագրերի դեպքում ստանալ վերադարձի էլեկտրոնային վկայական:
