Կստեղծվի աշխատանքային խումբ՝ գյուղոլորտի խնդիրներին օպերատիվ արձագանքելու համար
2021 թվականի հունիսի աննախադեպ շոգը, բարձր ջերմաստիճանը, ինչպես նաև մի քանի տարի անընդմեջ արձանագրվող գլոբալ կլիմայական փոփոխությունը ոռոգման համակարգում շարունակ խնդիրներ են ստեղծելու: Վարչապետի պաշտոնակատարն արձանագրում է՝ կաթիլային ու նորագույն տեխնոլոգիաների ներդրման հարցում հապաղելու ժամանակ չկա:
Նիկոլ Փաշինյան (ՀՀ վարչապետի պաշտոնակատար) - Մեր գլոբալ ռազմավարությունը գյուղատնտեսության ոլորտում պետք է լինի, մասնավորապես, կաթիլային ոռոգման և ոռոգման նոր տեխնոլոգիաների կիրառումը: Մենք, ինչպես նախընտրական շրջանում ասել ենք, առաջիկայում պետք է խթանենք կաթիլային ոռոգման ներդրումը, և այն, ինչ նախընտրական շրջանում խոստացել ենք, պետք է այդ ծրագիրը շատ արագ արդեն ներդնենք: Այսինքն՝ ընդհանրապես հապաղելու և հետաձգելու ժամանակ չկա:
Կլիմայական գլոբալ փոփոխությունների պայմաններում ավանդական ոռոգումն ապագա չունի, ասում է վարչապետը: Շատ արագ պետք է մեկնարկեն ջրամբարաշինական ծրագրերը, հայտարարել է վարչապետի պաշտոնակատարը:
Նիկոլ Փաշինյան - Մենք նաև արձանագրել ենք ջրամբարների կառուցման և ջրի ամբարման ծավալների մեծացման անհրաժեշտությունը, ինչը նույնպես պետք է շատ արագ սկսենք: Այսինքն՝ անհետաձգելի այդ գործընթացները, մեկ տասնյակից ավելի ջրամբարների շինարարության աշխատանքը պետք է սկսել:
Մինչ ծրագրերը կյանքի կկոչվեն, վարչապետը վստահ է՝ օրենսդրությամբ որոշակի ընթացակարգեր նախատեսված են, և քննարկվել է, թե որքանով ենք այդ ընթացակարգերը կիրառելու, որպեսզի գյուղացիական տնտեսություններն անջուր չմնան:
Նիկոլ Փաշինյան - Ինչպիսի որոշումներ պետք է կայացնենք և ինչպես պետք է իրագործենք այդ որոշումները, որպեսզի ոռոգման ջրով կարողանանք ապահովել մեր գյուղացիական տնտեսությունները, և մեր գյուղատնտեսությունը, որի առումով բավական լավ տարվա մեկնարկ ունենք, մեծ պրոբլեմների առաջ չկանգնի, կամ այդ պրոբլեմները լինեն կառավարելի:
Նիկոլ Փաշինյանը հանձնարարել է ստեղծել աշխատանքային խումբ, որը պետք է համակարգված աշխատանք իրականացնի գյուղոլորտի խնդիրներին օպերատիվ արձագանքելու և միաժամանակ ինստիտուցիոնալ լուծումներ, զարգացման տրամաբանությամբ աջակցության ծրագրեր մշակելու ուղղություններով:
