Սահմանից՝ սահման. տունը կորցրած արցախցիները վերաբնակեցվում են Տավուշի սահմանամերձ գյուղում

Ներքին Կարմիրում կարմիր ժապավենի օր է: Սահմանամերձ գյուղը դիմավորում է նոր բնակիչներին՝ Արցախից տեղահանված ևս մեկ ընտանիքի:

Բաղդասարյանների ընտանիքը Քաշաթաղի Վուրգավան գյուղից դուրս է եկել պատերազմի առաջին օրերին՝ հույսով, որ օրեր անց վերադառնալու է:

Լիանա Սմբատյան (Արցախից տեղահանված) - Առավոտյան շուտ պետք է գնայինք խաղող քաղելու, հասել էր բերքը, որ վաճառենք, նաև կով կթենք, միանգամից պայթյուն, կրակոցի ձայն: Ամուսինս էլ պայմանագրային ծառայող էր, զանգեց, ճշտումներ արեց, որ պատերազմ է սկսվել:

Ժամանակավոր ապրել են Գեղարքունիքի Ծովազարդ գյուղում, մինչև Ներքին Կարմիրաղբյուրում շինարարները կավարտեին իրենց մշտական հասցեի նոր բնակարանի նորոգումը:

Ռոբերտ Բաղդասարյան (Արցախից տեղահանված) - Ստեղծել, դրել էինք, կռվի պատճառով թողինք, չբերեցինք: Աստծուն փառք: Կփորձենք հարմարվել, ապրել, նորից սկսել:

Սահմանին մոտ վերաբնակեցված արցախցի ընտանիքի միակ ցանկությունը խաղաղությունն է, որ այլևս կռվի ձայն չլսեն:

Վերաբնակեցման այս նախագիծն իրականացրել է 4 կազմակերպություն: Երկու ամսում երկրորդ ընտանիքն են տեղավորել Ներքին Կարմիրաղբյուրում:

Անահիտ Քալանթարյան (FCN բարեգործական կազմակերպության Հայաստանի մասնաճյուղի տնօրեն) - Գույքը, հագուստը, սնունդը, 3 ամիս սնունդը կտանք, մինչև ոտքի կանգնեն:

Արմեն Սիմոնյան («Փարոս» հիմնադրամի ներկայացուցիչ) - Ծրագրում ենք ևս 20-25 տուն նվիրաբերվի արցախցիներին, որոնք կորցրել են:

Ուսումնական տարվա ավարտին գյուղի դպրոցը կհամալրվի նոր աշակերտներով: Բաղդասարյանները չորս երեխա ունեն:

Լարիսա Հովհաննիսյան («Դասավանդիր, Հայաստան» ծրագրի հիմնադիր) - Նաև պատերազմից հետ արտակարգ կրթություն ծրագիր սկսեցինք, աշխատեցինք երեխաների հետ:

Տեր Աբելը Մովսեսից է եկել՝ օրհնելու գյուղում ստեղծված նոր օջախը: Արցունքով է հիշեցնում այս տոհմի պատմությունը: Նախնիները Մուշից են, ուխտել են շատ զավակներ ունենալ:

Տեր Աբել քահանա Քարտաշյան (Մովսեսի Ս. Աստվածածին եկեղեցու հոգևոր հովիվ) - Այգեկութ չէր արել, խաղողը, արքայախնձորը, նուռը չէր քաղել, ստիպված տեղահանվեց, էլի անկոտրում կամքով է, գալիս է սահմանապահ գյուղ, հոգով սահմանապահ է, գիտի, որ հողը եթե չես մշակում,մշակողները ատամները սրած սպասում են:

Տեղահանված արցախցիներին աջակցող կազմակերպությունները վերաբնակեցման ծրագրեր ունեն նաև Ներքին Կարմիրաղբյուրի հարևան գյուղերում: